TJ Lalnuntluanga'n Zokhawthar a tlawh

Champhai South bialtu MLA TJ Lalnuntluanga, minister of state chuan nimin khan a bial Zokhawthar a tlawh a, tun hnaia lirnghingin chhiatna a thlen dante sorkar official-te nen an enfiah a, chhawmdawlna a sem nghal.

TJ Lalnuntluanga chuan, lir­nghing vanga vanduaithlak taka chhiatna thlengte en a, chhiatna tuarte dan anga chhawm­dawl dan tur enfiah tura kal a nih thu sawiin, "Chief Minister-in lir­nghing tuarte leh chhiat tawhnate a tawrhpuiin a ngai pawimawh em em a, Prime Minister leh Union Home Minister-te nen pawh inberáwn vatin thil awm dante an sawi tlang a, sorkar laipui lamin a ṭul anga chhawmdawl a inhuam thu an sawi," a ti a, an thil hmuhte chu thuneitu sang zawka an thlen tur thu a sawi.

Covid-19 vanga ei leh bàr zawnnaa Zokhawthar mipuiin harsatna a tawh lai, an ei bar zawnna bulpui ber a chah karah phunnawi mai loa theihtawp an chhuah chu fakawm a tih thu a sawi bawk.

Champhai DC Maria CT Zuali chuan, State Disaster Relief Fund hnuai­ah khuarèl chhiatna vanga vanduaina thlengte ṭanpuina chu dan ding lai anga pek ṭhin a nih thu a sawi.