Mizorama thar dawnfawhte dah ṭawih mek

Mizoram Pradesh Youth Congress Committee (MPYCC) chuan thuchhuah siamin, tun hnaiah Myanmar leh Mizoram páwn aṭangin dawnfawh lâk luh a tam avangin Mizorama thar dawnfawhte dah ṭawih mek a nih thu an tarlang.

MPYCC chuan, Myanmar leh Mizoram páwn aṭanga dawnfawh lak luh a tam avangin Mizorama thar dawhfawhte hralhna thei loin a hnawng mek niin an sawi a, "Dawnfawh thar hnem Làmzáwl khua, Saitual district chuan an dawhfawh thar tihralnaah harsatna an tâwk nasa a, suma chan mumal loin an dah ṭawih mek a ni," an ti.

Congress ṭhalaite chuan, "Kut hnathawktute intodelh turin nasa takin ṭang mah se, tun sorkar hian hlawhtlin tuma ṭang mekte ṭanpui thei loa an awm hi a pawi kan ti tak zet. Kut hnathawktu ṭang tak takte pawh an ṭang hlei thei lo a ni ta ber," an ti a; ram dang aṭanga kuhva lak luh nasat vangin Mizorama kuhva chíingtute'n harsatna an tâwk tawh a, Hnahlan leh a chhehvela grape chíngtuten ṭhahnem tak thar mah se, an hralh theih loh avangin harsatna nasa tak an tâwk bawk tih an sawi.

MPYCC tarlan danin, Mizoramah dawnfawh a ṭhat duh avangin hmun hrang hrangah an ching nasa a, Làmzáwl khuaah chuan chhungkaw 30 velin eizawnna tling turin hma an la a, cheng nuai 200 vel man thar thei tura an inngaih laiin, an dawhfawh tharte an hralh theih loh avangin pum 7,000 chuang chu a chhe tawh a ni.

Dawnfawh thartute tan tun thlengin sorkar hmalakna an la hriat loh thu sawiin MPYCC chuan, June thla laihâwl velah a thar vanglai a thleng tawh avangin tláwm tak takin a remchanna apiangah an zuar mek tih amn sawi a, "Kan ram chhung thlai thar hralhna ngaihsak a ni lo zel hi thil vanduaithlak tak a ni. Kan sorkar hrawn mek hian kut hnathawktu khawsak harsa zawk, thawk rimte a ṭanpui lo hi a pawi tak zet a ni," an ti.