ZPM Ṭhalaiin Ration-ah Mizo buh sem turin Chief Minister phût

ZPM Ṭhalai chuan thuchhuah siamin, ration-ah Mizo buhfai ngei sem thuai tur leh Mizo buh sem hun tur tichiang thuai turin chief minister Zoramthanga an phût.

Kum 2018 inthlanpui dawna Zoramthanga’n vai buhfai ei tihtàwp chungchanga a intiamna chu mipuiin an la theihnghilh lo tih tarlangin ZPM Ṭhalai thuchhuah chuan, “MNF sorkar term tawp lamah MNF sorkarin ration atan vai buhfai an sem tawh loh hun tur hi Mizo mipuite’n kan lo thlírin kan lo nghâk a, ration-a Mizo buhfai sem a nih hun tichiang thuai turin CM kan phût a ni,” a ti.

ZPM ṭhalaite chuan, MNF president Zoramthanga’n Mizoramah phaizáwl hectare 70,000-a zau a awm thu leh chu chuan Mizoram a châwm zawh thu te, sorkarna an chan chuan Mizoram mipuiin vai buh an ei tawh loh tur thu a tiam tih an sawi a, “Mipuite’n sorkarna an pe a, an sorkar term a tàwp dawn thlenga vai buhfai hlir kan la ei leh May 21, 2022-a Supply minister Pu K Lalrinliana’n, ‘Buhfai kan dah khawl zingah kan thar a awm lo’ a ti leh si,” an ti a, mipui an barakhaih thu an sawi.

MNF president leh chief minister Zoramthanga chu a lo sawi tawh anga leilet neitute hnena kháwl sem tur leh vai buhfai ei titawp a, ration atan Mizo buhfai sem turin ZPM Ṭhalai chuan an phût a ni.