MLA fund aṭangin sikul pui dawn

1st Bn MAP English Medium School chuan nimin khan HSLC Examination 2022-a an zirlai zawng zawng an pass vek lawmna an buatsaih a, bialtu MLA Robert Romawia Royte, minister of state-in a hmanpui. Minister chuan, MLA fund aṭangin thla tin Rs 15,000-in 1st MAP sikul a puih tur thu a sawi.

Robert Romawia Royte chuan, sikul naupang an ṭhathnem avanga class room siam belhna tur project siamin sum a zawnpui tur thu sawiin, “Mizo nu leh pate’n state páwna fate zirna atana sum sên kan inhuam anga state chhunga kan fate zirna sum senso atana kan inhuam chuan tun aia sikul ṭha hi Mizoramin kan neih ka ring,” a ti a; National Education Policy, 2020 angin sikul thuneitute chu naupangte infiamna uarpui turin chah.

Minister chuan, 1st MAP English Medium School-in HSLC an hmachhawn vawi hnihnaah an zirlai zawng zawng an pass vek chu a lawmpui thu leh sikul hmasawnna tura kawng hrang hranga ṭanpui a inhuam thu a sawi a; lumpsum grant dinhmuna ding an nih avangin MLA fund aṭangin thla tin Rs 15,000-a a puih tur thu leh an zirtirtu mi 21 tan uniform man tur Rs 5,000 ṭheuh a tumsak tur thu a sawi bawk.

Robert Romawia hian sikul tan infiamna hmanraw chi hrang hrang a pe a; khualzahawm Christina Roluahpuii Sailo, bialtu councillor pawhin computer a pe a ni. 1st Bn MAP English Medium School-ah hian zirlai 253 leh zirtirtu 21 an awm mek.