Naupang dikna chanvo humhalhna sawiho
Kolasib district child protection officer (DCPO) Dr David Zaitinvawra chuan nimin khan Kolasib district MJA member-te kâwmin, naupang dikna chanvo humhalhna lama hmalaknate a sawipui.
Kolasib DCPO chuan, danin naupang a humhalh tih sawiin, “Naupang ṭanpui ngai, venhim ngai ang chite committee hrana siam a ni,” a ti a; Kolasib district-ah sorkar pawmpui naupang awmna home pahnih - Salvation enkawl ‘Enna In Boys Home’ leh UPC kohhran enkawl ‘Audrene Scism Children Home’ a awm thu a sawi a ni.
Home-a naupang dah luh chungchangah Child Welfare Committee (CWC)-in uluk takin an ngaihtuah ṭhin tih sawiin David Zaitinvawra chuan, “Tunah chuan dan hnuaiah felfai taka tih a ni tawh. CWC-in home-a naupang dah luh leh lâk chhuah chungchang uluk takin an vil a, awm tlâka an ngaihte chauh home-ah dah ṭhin a ni,” a ti a; home-te chu Juvenile Justice Act hnuaiah ziah luh vek a ngaih thu a sawi.
Kum tling lo pawikhawihte chu special home-ah emaw, remand home-ah emaw dah an ni ṭhin tih sawiin DCPO chuan, “Kum 16 tling chinte chu an thil tih azirin puitling hremna ang tho pek leh jail-ah khung theih an ni. Naupang pawikhawih an awmin khawtlangin hma la tho mahse JJ Board-ah thlen zel a ṭha,” a ti.
Kolasib DCPO chuan, dan anga fa lâk theihna JJ Act-ah tarlan a nih thu sawiin, “Kolasib district-ah hian dan anga fa lâk theihna, naupang awmna home kan nei lo,” a ti a; dan hnuai ni loa fa inpek chu hrem theih a nih laiin leh dan zawm chu naupang leh fa latute tan a him zawk thu a sawi.
Dr David Zaitinvawra chuan, naupang harsa bikte chhawmdawlna tur sponsorship scheme a awm thu sawiin, scheme kaltlangin Kolasib district-ah naupang 40 hnenah sum leh paiin office-in a châwm thin thu a sawi a, “Mamawh zual bik naupangte chu thla tin Rs 2,000 pein sponsor an ni,” a ti.`
KOLASIB DISTRICT DINHMUN
JJB Case (2016-2022)
1. Pawngsual tâwk naupang - 106
2. Kumin bikah naupang pawngsual - 5
POCSO Case (Puitling) (2016-2022)
1. Naupang khuaikhemtu - 69
2. Kuminah naupang khuaikhemtu - 4
POCSO case (Naupang) (2015-2022)
1. Thubuai siamsak zat - 26
2. Kumina thubuai siamsak - 1