Puak thei thil chungchang sawiho

Lawngtlai additional DC James Miahlung hoin nimin khan DC conference hall-ah puak thei thil hman phalna nei (explosive license holder) leh silai leh a mû zuarte an ṭhukhawm a, dan leh hrai bakah felfai zawka puak thei thil leh silai hman leh zawrh dan tur an sawiho.

James Miahlung chuan, sorkar laipui thuchhuak anga ṭhukhawm an nih thu sawiin, “Puak thei thil leh silaite hi hman sual theih leh pawi khawihna atana hman theih, ram chhung rálmuanna tichhe thei a ni,” a ti a; license neitute chu an mawhphurhna a san thu leh danin a phal chin leh dan ang taka an license hmang turin a chah.

Lawngtlai SDPO Beimosia Lapi chuan, Explosives Acts 1884, Explosives Rules 2008 leh Explosive Substances Act 1908 te, puak thei thil leh silai hman leh zawrh chungchanga hriat tur pawimawh leh dan bawhchhiate hremna hrang hrang a sawifiah a; SDC H Vanlalbiakzauva’n license pek dan a sawi bawk.

Lawngtlai district-ah hian explosive license nei mi 14 an awm a, lung lâkna (quarry)-a hman tur a ni tlangpui. Silai leh a mu zawrh phalna nei mi pahnih an awm mek a ni.