Covid-19 vei mi 116 chiah an awm tawh

Mizoramah Covid-19 vei zat a tlakhniam belh zel a, nimin tlai khan enkawl lai (active case) mi 116 chiah awm tawhin, nikum April 9 hnua active case an tlem ber lai a ni.

May 22, Pathianni khan Covid-19 vei mi 11 hmuh chhuah a ni a; nimin khan hripui vei dam tawh mi 24 chhuahtir niin, hripui vanga thi an awm lo.

Pathiannia hripui vei hmuh tharte chu mipa pakhat leh hmeichhia 10 an ni a; TrueNAT hmanga hmuh pakhat leh RAT hmanga hmuh 10 niin, positivity rate chu 14.29% a ni. Mi 11-te chu Lunglei district-a hmuh paruk, Aizawl leh Saitual district-a hmuh pahnih ve ve leh Kolasib district-a hmuh pakhat an ni a; Aizawl páwn lam mi vek an ni.

IDSP record angin, Mizoramah Covid-19 vei 2,28,137 hmuh chhuah a ni tawh a, mipa 1,06,216 leh hmeichhia 1,21,921 an ni a, mipa aiin hmeichhia 15,705-in an tam zawk. Nimin tlai dar 5 thleng khan mi 2,27,323 (99.64%) chhuahtir an ni tawh a, mi 698 (0.31%) thi tawhin, enkawl mek mi 116 (0.05%) an awm.

Hripui vei zinga mi 24-te nimina chhuah zalen an nih hnuah Mizoramin April 9, 2021 hnua Covid-19 active case a neih tlem ber lai a ni a; April 9, 2021 tlai khan active case 90 awmin, a tuk April 10, 2021 tlaiah chuan mi 137 an awm leh tawh a ni.

Nimin tlai khan Mizorama district 11 zingah Covid-19 vei mi 40 awm tlinna a awm tawh lo a; active case tamna ber Saitual district-ah mi 36 an awm. District pathum - Siaha, Champhai leh Lawngtlai district-ah hripui vei an awm rih lo a; Kolasib, Khawzawl, Mamit, Hnahthial leh Serchhip district-ahte mi 10 an an awm tling tawh lo bawk.