Mizorama National Highway km. 921 Cheng vbc. 2381 sêngin an chei tha

Union of minister of state for Road Transport & Highways, Shipping Mansukh Madaviya chuan Mizorama National Highway (NH) km. 921-a thui chu cheng vbc. 2381 sênga chei ṭhat leh tihhmasawn mek a nih thu a sawi.

Mansukh Madaviya hian nimin khan CMO conference hall-ah thuthar thehdarhtute a kâwm a; a sawi danin, Mizorama NH awm km. 1,482 zinga km. 309 chu tihhmasawn mek a ni a, km. 612 chu chei ṭhat mek a ni. Hna thawhna atan cheng vbc. 2381 ruahman a ni a; Ministry of Road Transport & Highways (MoRTH) leh state sorkarte chu fûr hmaa hna thawk zo hman ngei tura tih an ni.

Union Minister chuan, NH-54 lane hniha siamna tur chu Ministry-in a pawm tawh thu sawiin, "NH-54 siam tur hi km. 372 a ni a, a senso atan cheng vbc. 6168 ruahman a ni. Project hi Japan International Cooperation Agency-te tum turin North East Road Network Connectivity Project phase-I hnuaiah ruahman a ni," a ti.

Zawhna chhangin Union Minister ṭawi­awmtu MoRTH official-te chuan, NH-54 double lane siamna tur atan hian ruahmanna kalpui mek a nih thu leh fûr hma ngeia hna thawh hman tum a nih thu an sawi.

Project hi zawh el a nih hunah chuan sumdawnna, tourism, socio-economic, etc. lamah nghawng a neih tur thu sawiin Mansukh Madaviya chuan, "India leh Myanmar-te nena inlaichinna ṭha zawk neihna atan pawh a ṭangkai dawn. Kawng hian Kaladan Multi Modal Transport corridor pawh a paltlang dawn a; kawng, tui leh marine transport kaltlanga hmarchhak leh Myanmar-te tlawh a awlsam phah dawn a ni," a ti.

NH atana tender chhuah chungchanga zawhna chhangin Minister ṭawiawmtu MoRTH official-te chuan, tun hma chuan cheng vbc. 25 chin chu state kutah dah a ni ṭhin a, tunah chuan state kutah dah vek a ni tawh tih an sawi.

PWD chief engineer (Highways) K Lalsawmvela chuan, tender chhuah chung­changah hian CE (Highways) chu chairman ni mah se, thuneitu tak tak an ni lo nia sawiin, "Tender kan chhuah a, a thlan tak takah chuan MoRTH-a hmarchhak min bialtu remtih a ngai a, a rawn zin theih ṭhin loh avangin Guwahati-ah kan thawn a, anni'n a lo thlang ṭhin," a ti.

Cheng vbc. 300 chinah chuan Delhi-a PWD CE thuneihna a nih thu sawiin, Lalsawm­vela chuan, "Tender chu kan chhuah a ni tho a, a thlan kawngah thuneihna tak tak kan nei lo," a ti a; cheng vbc. 300 chung lamah chuan PWD-in inrawlhna a nei lo niin a sawi.

Chemical & Fertilizer changtu ni bawk Mansukh Madaviya chuan, damdawi man tlawm zawrhna (Jan Aushadhi Store) hawng turin ministry lamin cheng nuai 2.5 -a a puih theih thu sawiin, "Mimal, NGO, co-operative leh state government agency-te'n an dil thei reng. Mizoramah dawr 25 hawn theih tura ruahmanna siam a ni," a ti.

Thuthar thehdarhtute a kawmnaah hian Union Minister hi chief minister Lal Thanhawla leh PWD hotute'n an ṭawiawm a ni.

Union of Minister of State for Road Transport & Highways hian nimin vek khan Chief Minister leh Governor a kâwm a, Mizoram BJP office a tlawh bawk a; vawiinah NH-44-A siam hna thawh mek a tlawh ang.