Mizoram kan chhuahsan lo ang - CIJWS Commandant

Counter Insurgency and Jungle Warfare School (CIJWS) comman­dant Maj.Gen. MS Ghura chuan, nimin khan CM Bangla-ah chief minister Lal Thanhawla a kâwm a; CIJWS Commandant chuan Mizoram an chhuah­san loh tur thu a sawi.

Maj. Gen. MS Ghura chuan, CIJWS hmunhma zauhna atana ram an lak tur chu a fel ṭêp tawh tih sawiin, "Ram tihfel a la nih loh avangin training centre changkang tak sa tura hmalakna tur a khawtlai a ni," a ti a; Assam sorkarin CIJWS atan an duh zat ram an pek theih thu sawi mah se, Mizoram an chhuahsan loh tur thu Chief Minister a hrilh.

Chief Minister chuan, CIJWS chu Mizoram sorkar leh mipuite'n hun rei tak aṭangin an hmel­hriat tawh thu sawiin, "Rambuai hmain Mizote chu sipaiah kan tam a, officer pawh ṭhahnem tak kan nei. Mahse, ram­buai leh an boruak tawnte avangin ṭhalaite rilruah sipai laka rilru helna apiang a, remna leh muanna kan neih hnuin ṭhalaite rilru pawh a ṭha lamin a inthlak chho a, tunah chuan Mizo ṭhalai sang tam tak chu Indian army-ah awmin ram tana venhima hna ṭhahnemngai takin an thawk mek a ni," a ti.

CM leh CIJWS Co­mman­dant hian Myan­mar rama China hmalak dan sawiin, an luh thûk zel chuan nakinah India tan harsatna an thlen theih thu an sawi a; CM Hawla chuan, Myanmar nen inlaichinna sawhnghet turin Mizoram sorkarin theihtawp a chhuah thu a sawi.

CIJWS hi kum 1967 khan Meghlalaya-a Jaintia Hills-a Mynkre khuaah bul ṭan a ni a, khatih hun laia Eastern Army Command-a general officer comman­ding-in-chief (leh a hnua field marshal hmasa ber) Gen. Sam Manekshaw ngaih­tuah chhuah a ni.

Kum 1970 khan Vairengte­ah suan an ni a, tuna an awmnaah hian an awm nghet ta a ni.