Myanmar MP-te'n Larsap an kâwm

Myanmar-a MP panga leh political party hruaitute chuan Mizoram an rawn tlawh a, Thawhlehni tlai khan Governor Lt. Gen. Nirbhay Sharma an kâwm.

Governor chuan, Myanmar palaite chu Mizoram an rawn tlawh theih vangin lawmawm a tih thu a hrilh a, "India leh Myanmar inkarah inlaichinna ṭha leh thawhhona ṭha tak siam turin ṭan lak dun a ngai. Mizoram chhim lam kaltlang tur Multi Modal Project peih mek chuan nasa takin he lai bial hi a tihhmasawn ka beisei a, India leh Asia chhimchhak ramte indawr tawnna kawngpui ni mai loin, sumdawnna hmunpuiah siam i tum ang u," a ti.

Inkalpawhna piah lamah inbiak­pawhna, hriselna leh zirna lamah pawh Myanmar leh India chu inpui tawn thei kan nih thu sawiin Governor chuan, ram pahnihte inkar boruak siamṭha lehzual turin ṭawng inhriatthiam tawn a ngai," a ti a, ṭawng inhriat tawn theihna atan ṭanlak a ṭul thu a sawi.

Myanmar MP Oo Hla Saw chuan, an ram lama Multi Modal Project chu zawh a nih ṭêp thu sawiin, "Tuna Myanmar-a bungrua lut tam zawk chu China aṭangin a ni a, he kawng hman a nih theih hunah chuan India siam bungrua ṭha tam tak kan ramah hralh a tlak ka ring," a ti a; Asia chhimchhak ram dangte nen insumdawn tawnna nasa taka a ṭhan tur thu a sawi.

Larsap hian Myanmar palaite hi zanriah a buatsaihsak a ni.