Vanglaini logo

CSS Hindi zirtirtute'n kawng an zawh

Centrally sponsored scheme (CSS) hnuaia Mizorama Hindi zirtir­tute chuan, nimin khan Aizawlah kawng an zawh a; thla 10 chhung hlawh an lak tawh loh pe tur leh an thawh chhunzawm zel theih nan dah nghet (regularise) turin Mizo­ram sorkar an phût.

Mizoram CSS Hindi Teachers Association (MCHTA) chuan kawng zawh hi zing dar 9:30-ah Chanmari kâwn aṭangin an ṭan a, mi ṭha­hnem tak an tel. Kawng lakah ṭum eng emaw zat dingin thu an sawi a, chhun dar 12:30 velah an tawpna hmun, Vanapa Hall kawt an thleng a ni.

MCHTA hruaitute chuan, an thil phûtte chu tih theih loh a nih loh thu sawiin, "Thil theih loh kan ngen lo a, sorkarin a tih theih chin kan hria. Kan Chief Minister hi kan ring tâwk a, kan thil phût hi min tihhlawhtlinsak kan phût tlat a ni," an ti.

Hlawh an lak theih dan tur leh an thawh chhunzawm theihna tura sorkar hotute an dawr tawh chinah thu lawmawm an la dawng lo tih sawiin, "Dil rawh u, tichuan in hmu ang, tih ring chungin kan dil a, kan hlawhtlin ngei kan beisei. Beiseina sang tak nen sorkar chungah kan innghat a ni," an ti a; anni aia ṭanpui mamawh an awm tawh chuang lo tih sawiin, ṭanpui an ngai a, ṭanpui an ngen tih an sawi.

MCHTA hruaitute chuan, sikula an thawhnaah Hindi teacher ni mah se, Hindi chauh an zirtir ngai lo a, subject hrang hrang an zirtir ṭhin tih an sawi bawk.

CSS Hindi zirtirtute hian nizan dar 12 thlenga thu lawmawm an dawn loh chuan vawiin zing dar 9 aṭangin CM Bangla bulah sit-in demonstration neih leh an tum.

CSS Hindi teacher-te hi CSS of Financial Assistance for Appointment of Language Teachers hnuaia rawih niin, February 18, 2011-ah mi 1,305 rawih ṭan an ni a; Hindi teacher-te chu high school-ah 389 leh middle school-ah 916 dah an ni.

Hindi teacher-te hlawh chu sorkar laipui tum vek niin, a tirah chuan H/S-a thawkte tan thla khatah Rs. 9,750 leh M/S-a thawkte tan Rs. 7,500 a ni a, October 1, 2011 aṭangin H/S-a thawkte tan Rs. 20,000 leh M/S-a thawkte tan Rs. 15,000-ah tihsan a ni. March 1, 2015-ah H/S leh M/S-a thawkte hlawh chu Rs. 29,000-ah tihsan a ni leh bawk.