Myanmar MP-te'n Zoramthanga an kâwm

Mizorama chám mek Myanmar MP-te chuan February 21, 2017 MNF president Zoramthanga chu a chenna inah an kâwm a; Zoramthanga'n Myanmar rama remna palai hna a thawh dante leh Mizoram leh Myanmar inkar chungchangte an sawipui.

India rama an lo kal leh Mizoram an rawn tlawh chhan ber chu India sorkarin chi bing hel hote inremna nei tura an dâwr dan hre chiang a, Myanmar rama an ṭangkaipui ve theih dan tur zir tur an ni.

Myanmar MP-te chuan, an ram chu economic leh politics-ah an insingsa mek tih sawiin, hma an sawn zel theih nan an ṭhenawm ramte nena hnam zia hriat­sak leh thawhho theih dan tur ngaihvena kal an nih thu an sawi.

Zoramthanga chuan, Myanmar ramah leh India hmarchhak bialah remna awm thei se tih chu a duhthusam a nih thu sawiin, remna a awm theih chuan Mizoramah pawh remna leh muanna ngêlnghet zawk a awm phah thei dawn tih a sawi a ni.

Myanmar MP leh political party hruaitute hian MNF dintu Laldenga (L) nupui lalbiakdiki, Chief Information Commissioner leh Presbyterian kohhran hruaitute an kawm a; Mizoram University an tlawh bawk.

Myanmar MP-te hi panga an ni a, political party hruaitute nen an vaiin mi 10 an ni. February 17-ah New Delhi an thleng a, February 21 khan Mizoram an rawn thleng a ni. Vawiinah Mizoram an chhuahsan leh ang.