CM-in Apex Bank branch thar a hawng

Mizoram Cooperative Apex Bank-in New Secretariat-a branch thar an siam chu, nimin khan chief minister Lal Thanhawla'n a hawng.

Chief Minister chuan, Apex Bank-in sorkar hmunpui ber New Secretariat Complex-a branch an nei thei chu a lawmpui thu a sawi a; cooperative bank-te chu India economy siamṭhatu pawimawh tak an ni tih sawiin, NLUP leh NEDP kalpuinaah sorkar nen ṭha taka an thawhho zel a beisei thu a sawi.

Lal Thanhawla chuan, sorkar laipuiin direct benefit transfer system leh cashless transaction a uar mek tih sawiin, chumi kawngah chuan MCAB pawhin theihtawp an chhuah zel a beisei thu a sawi a; bank hman tam chu changkanna kawng pakhat a nih thu sawiin, mipuite chu uar lehzuala bank hmang ṭangkai turin a chah.

MCAB New Secretariat Branch building thar hi Secretariat building bulah a awm a, a sak nan cheng nuai 296.82 sen a ni. A hawnnaah hian Home minister R Lalzirliana, Finance minister Lalsawta, Fisheries minister Dr BD Chakma leh parliamentary secretary Hmingdailova Khiangte te pawh an tel a ni.