MAA leh PMSMA chungchang zirho a ni

Nimin khan IPR directorate auditorium-ah Mother Absolute Affection (MAA) leh Pradhan Mantri Suraksit Matritva Abhiyan (PMSMA) chung­chang zirhona buatsaih a ni a, district hrang hranga chief medical officer (CMO)-te leh Indian Medical Association (IMA) leh FOGSI hotute an tel.

Sensitisation workshop hi National Health Mission (NHM) state programme manager Dr Lalthantluanga'n a kaihruai a; Maternal & Child Health state nodal officer Dr Zochhuanawmi leh Reproductive & Child Health (RCH)-a consultant Dr Zomuanpuii ten PMSMA leh MAA chungchanga hmalaknate leh a kalphungte sawifiahin, RCH state programme officer Dr Vanlalsawma'n PMSMA dinhmun a sawi.

RCH SPO chuan, nu nau chunga thi tihtlem nan sorkar laipui kaihhruainain nasa taka hmalak a ni a, hmasawnna tam tak a awm tawh mah se, first trimester-a nu naupai inentir zat leh ANC kim taka nei nu naupai awm zat duhkhawp a la nih loh avangin Ministry of Health & Family Welfare chuan hmalakna thar, PMSMA a duang chhuak leh tih a sawi.

An sawi danin, PMSMA-in a tum chu, nuin nau a pâi chhunga second trimester emaw, third trimester-ah doctor ngeiin ANC a neihsak a ni a; chu chuan nasa takin naupai kaihhnawih harsatnate leh nau ṭhan ṭha lo, pum chhunga naute thi leh a dangte hmuh chhuah kawngah a pui ang a, raicheha thihna a tihhniam beisei a ni.

PMSMA hnuaiah hian thla tin ni 9-ah sorkar damdawi-ina gynaecologist/medical officer-te'n nu naupai thla 4-9 inkarte an en ṭhin tur a ni a, thisen leh zun endik leh ultrasound-te tihsak tur a ni. PMSMA kalpui a nih aṭangin PMSMA clinic bikah nu naupai 6,718 en an ni tawh a, chu mi zinga 6.8% chuan nau pai kaihhnawih harsatna an nei tih hmuhchhuah a ni.

MAA chungchangah, nausen hnena nu hnute tui pek chu nausen dam khawchhuah nana thil pawimawh tak a ni tih sawiin, "Nau a pian aṭanga nu hnute tui hnêktirin nausen thihna 20% a pumpelh thei a, naute nu hnute ring chuan nu hnute ring lo aiin a let 11-in kawṭhalo vanga thihna an pumpelh thei a, a lêt 15-in pneumonia vanga thihna an pumpelh thei bawk," an ti.

Rapid Survey of Chidren (ROSC) 2013-14 a neihah Mizoram chu nau piang darkar khat chhunga nu hnute tui pek kawngah 84.8% a ni a, India ram pum­ah a ti ṭha ber pawl a nih thu an tarlang.