Thil siam chhuah leh lak luhte a ṭhat tâwk theih dan tur sawiho

State Level Committee for Standardi­zation & Quality Systems chu nimin khan chief secretary Lalmalsawma hoin CS conference room-ah an ṭhu a; thil siam chhuah leh lak luhte a ṭhat tâwk leh ṭhat loh finfiah dan tur an sawiho.

Chief Secretary chuan, Bureau of Indian Standard Body (BIS) leh Mizoram sorkar official-te chu bungraw ṭha leh rintlak a awm theihna tur leh state chhunga ei tur siam chhuah sâwngbàwl dante a thianghlim tawk em tih te, state páwn aṭanga eitur lak luhte a him tâwk em tihte mipui vantlangin an hriat chian theih nan uar zawka zirtirna kalpuiin thawk dun se ṭha a tih thu a sawi.

BIS, Kolkata-a DDG Bishnu Gupta leh Guwahati-a scientist KC Santra chuan Mizorama an hmalakna leh an thil hmuhte meeting-ah hian an sawi lang a; BIS hmalakna chak zawk nan leh Mizoram mipuite'n an sum hman ral phû tawk bungraw ṭha an lei theih nan zirtirna chak zawka kalpui a ṭul thu an sawi.

Meeting-ah hian, Mizorama bungraw lak luh leh mipui hman tura thil siamte'n ṭha tawk tura BIS-in ruahmanna a siam, ISI chhinchhiahna chuang pha an ni em tih leh mipuiin an thil/bungraw lei chungchangah an chanvo an hriat theihna tura hmalak dan turte sawiho a ni.

National Standards Body tia hriat lâr, BIS hi India ram chhunga kawng hrang hranga thil siam chhuah leh hnathawh dan tur dinhmun leh tehfung (standard) ruahmantu ber a ni a; ISI, ISO, ECO, etc. chhinchhiahna hrang hrang a pekte chu rinhlelhawm emaw, duhthusam lo a awm a nih chuan BIS office hnai bera Public Grievance Officer hnenah chiang taka a chhan leh vang tarlangin sawi­sel theih a ni.

Lungawih lohna thlente chu rang taka bawhzui zel a ni tih BIS hotute chuan an sawi.