Covid-19 rualin sikserh pawh do a ṭul - Kolasib DC

Kolasib District Task Force on Malaria chuan nimin khan an chairman, DC Dr H Lalthlangliana hoin a pisaah Anti Malaria Month hman dan tur an rél. Bawrhsap chuan, Covid-19 rualin fimkhur taka sikserh pawh do a 

ṭul thu a sawi.

Dr H Lalthlangliana chuan, Covid-19 vanga ramri vénga ṭhlalai tam tak an riah chhuah mek laiin, hri dang, thihpui theih hlauhawm tak tak laka invèn nachang hriat a ṭul thu a sawi a, "Co­vid-19 kan do rual hian malaria pawh fimkhur taka kan do tel a ngai. Kolasib aṭangin ramri venga riak chhuak ṭhahnem tak an awm avangin malaria vei leh vei loh endik hna ngawrh taka kalpui a ṭul," a ti.

Kolasib DC chuan, ramria duty-te bakah, huan leh loa riak chhuak­te'n sikserh an vei leh vei loh endik vek a nih theih nan ruahmanna siam a nih tur thu a sawi.

District malaria offi­cer Dr RK Lalthlamuana chuan, an district chhung­a sikserh dona kawnga an hmalaknate a sawi a, "January aṭanga May, 2020 inkar khan mi 4,124 thisen endik a ni a, malaria PF vei paruk leh PV vei mi pahnih hmuh chhuah a ni," a ti.