Hindi zirtirtute CMO bulah an pungkhawm ; An tan sorkarin theihtawp a chhuah - CM

CSS hnuaia Hindi zirtirtute chu nimin khan an thil phût nawr chhunzawmna atan zing dar 9 aṭangin Chief Minister Office (CMO) luhna gate-ah an pung khawm a, an thil phût a hlawhtlin hma chu awm an tum. Chief minister Lal Thanhawla chuan, CSS Hindi zirtirtute an thawh chhunzawm theih nan sorkarin theihtawp a chhuah tih a sawi.

Hindi zirtirtute hian an thil nawr chungchangah nimin chawhma khan Chief Minister hmuh an tum a, mahse, an hmu thei lo tih sawiin an hruaitute chuan, "A personal secretary thurâwn angin lehkha kan thehlut a ni," an ti.

Chief Minister hnena lehkha thehluhah hian CSS Hindi teacher-te chuan, February 2017 tàwp ruala an thawh hun a tawp dawn vanga an thlaphân thu te, sorkar laipui guideline anga dahngheh an phût thu te, an thil phût chu February 25, 2017 hmaa tihhlawhtlin an phût thu te, thu lawmawm an dawn hma chuan CMO gate bulah an lo nghah reng tur thute an tarlang.

CSS Hindi zirtirtute hi February 28, 2017-ah an contract a tàwp dawn a, an thawh chhunzawm zel theihna tura sorkar nawrna atan pen down strike, mass casual leave leh kawngzawhte an lo huaihawt tawh a ni.

Hetih lai hian CM Lal Thanhawla chuan thuthar thehdarhtute ṭhenkhatte'n nimina a pisaa an kawmnaah, Hindi zirtirtute tan sorkarin theihtawp a chhuah tih sawiin CM Hawla chuan, "Kan nawr nasat avangin a concern ministry pawh an lu a hai hle. Kum 2017-18 budget estimate-ah cheng vbc. 125 an dah thu Mizoram House-a Principal RC leh OSD-te'n min rawn hrilh," a ti.

CSS Hindi zirtirtute chuan rawih an nih dawnin an hun tawp huna pawhsei theih an nih loah leh an hun tawpah chuan báng tawp tura an intiam thu a sawi a, "Hei hi thiam inchan nana ti kan ni lo. Mizoram mipuiin thu dik an hriatna atan sawi ka ni," a ti.

CM Hawla chuan, CSS Hindi teacher-te'n an duh an sawi thiang tih sawiin, "Kan tih theih chin bak kan ti thei lo. Kan rawih an ni lo a, mawh kan phur lo chu kan ti lo. Keini chuan chhunzawm zel thei se kan duh a, Mizo mipuiin Hindi thiam se kan duh," a ti a; Hindi thiam chu India khua leh tui nih inpawmna atan pawh a ṭangkai thu a sawi.

Sorkar laipui aṭanga zir chiangtute'n CSS Hindi teacher-te avangin zirlaite'n Hindi an thiam phah lo nia an hmuh chhuah thu sawiin Lal Thanhawla chuan, "Hindi thiam tak tak pawh an awm mai thei a, mahse, a zir chiangtute'n CSS Hindi teacher-te vangin zirlaite'n Hindi an thiam phah lo tih an hmuh dan a ni miau si. A zir chiangtute an lo kal leh dawn a ni awm e," a ti.

Chief Minister chuan, kum hnih/thum kal ta khan Environment & Forest department-a CSS hnuaia thawk mi 200 chuang bân an ni tih sawiin, "Engmah lungawi lohna lantir loin an bâng a ni. CSS Hindi teacher-te pawhin anni hi entawn se kan duh hle," a ti.