Ṭhuampui-Tuirial kawngpui dan a ni
Undivided Zemabawk Joint NGO Committee huaihawtin, nimin khan Zermabawk leh an ṭhenawm veng khawtlangin NH-54, Ṭhuampui leh Tuirial inkar kawngpui chhe lutuk vanga lungawi loh lantir nan NH-54 kawngpui an dang a; vawiin zing dar 7 aṭangin tiam chin awm loin an dang chhunzawm dawn.
Ṭhuampui leh Tuirial inkarah hian hmun pali - Ṭhuampui, Falkland Veng peng, Zemabawk leh Tuirialahte an dang a; kawng dannaa duty turin mi ṭhahnem tak an thawk chhuak. Vawiin zing dar 7 aṭanga tiam chin awm loa an dan chhunzawmna turah chuan Sihphir/Durtlang lam aṭanga Muanna Veng panna pawh dan an tum a ni.
Undivided Zemabawk Joint NGO Committee hotute hnen aṭanga thu dawn danin, nimin lamah sorkar aṭangin thu leh hla an dawng lo a, chuvang chuan vawiin zing aṭangin tiam chin awm tawh loin kawng an dang chhunzawm dawn a ni.
Kawng danna hmunah hian police-te an duty a, buaina chhuak a awm lo. Zirlai exam tur te, damdawi-in kal tur te, mitthi ina kal turte leh ṭul bik thil vanga phalna late chu an kaltlangtir zel thung a ni.