KHAWTHLIR
YMA conference
Tuichangral South Group YMA chuan, nimin khan Biate khuaa Zialung Hall-ah conference vawi 45-na an hmang a; bialtu MLA Vanlalawmpuii Chawng-thu khuallian niin, Central YMA aṭangin vice president Vanlalruata'n a hmanpui bawk. Conference-ah hian branch hrang hrangte lengkhawm zai leh solfa zai hmangin an intihsiak a ni. Conference hi vawiinah chhunzawm a ni ang.
National seminar
Hrangbana College chuan nimin khan an college Golden Hall-ah, 'Mizo lengkhawm zai: Significance, role and impact on Mizo literature' tih thupui hmangin national seminar an buatsaih a; mithiam
ṭhahnem takin thupui chi hrang hrang an sawi. Seminar hi vawiinah chhunzawm a ni ang.
Driver tha
28th. Road Safety Week, 2017 pualin lirthei khalhtute fimkhur a ṭulzia leh infuih tharna atan Kolasib khawpuia auto-rickshaw, taxi leh maxicab khaltu ṭha thlan a ni a, nimin khan DC H Lalengmawia'n a pisaah chawimawina thuziak a hlan. Lawmman dawngtute chu K Rohming-liana (auto-rickshaw), Lalhlimawma (taxi) leh Lalramsiama (maxicab)-te an ni.
Larsapin sûn
Mizo zinga sipai bang zinga upa ber pawl, nimina Tlangnuama vui liam tak Sub.Maj. (Hony Capt) R Lawma (96) chhungte chu nimin khan Governor Lt.Gen. Nirbhay Sharma-a'n sûnna lehkha leh kuang chunga dah tur pangpar a thawn.
Hospital sawiho
Nimin khan Serchhip DC Dr Lalrozama hoin a pisaah Health director Dr K Lalbiakzuala leh sorkar official dangte an ṭhukhawm a; Serchhip District Hospital (Extended District Hospital) sak thar hna bul ṭan thuai theih dan tur an sawiho.