Union Minister-in Larsap leh CM a kâwm

Union minister of state for Roads, Transport & Highways Mansukh Mandaviya chuan, Nilaini zan khan Governor Lt. Gen. Nirbhay Sharma leh chief minister Lal Thanhawla an chennaah a kâwm.

Governor chuan, Mizoram a tlawh avang­in Union Minister chu lawmthu a hrilh a, "Hmarchhak bial hi nakin lawka sumdawnna hmun pawimawh a nih dawn avangin kawngpui ṭha nei a pawimawh. Mizoram hi thing leh mauah a hausa a, sorkar ṭanpuina nen sumdawnna lian tham taka siam thei a beiseiawm. Sumdawnna kawnga thâwm nei thei tak tak tur chuan inkalpawhna kawngpui, lui kawng leh thlawhna hmanga ram chhung leh páwn a inzawm ṭhat a ngai a ni," a ti.

Mansukh Mandaviya chuan, hmarchhak bial zawng zawngte chu thlai leh theiah an hausa tih sawiin, "Khawvelin damdawi tel miah lo thlai leh thei (organic food) a ngaisang em em a ni," a ti a; hei hi hmarchhak biala sorkar laipui hmalakna tur kawng thar a nih thuai tur thu a sawi.

Chief Minister nen an inkawmnaah Union Minister chuan, inkalpawhna ṭha chu sorkar laipui ngaih pawimawh berte zinga mi a nih thu sawiin, "Mizoram kaltlanga hmarchhak leh ram chhung hmun dang te, Myanmar leh ṭhenawm ramte nena inthlun zawmnaah Mizoram hian dinhmun pawimawh tak a luah a, Mizoram hmabak a êng a ni," a ti.

CM Lal Thanhawla'n Mizoram chu tlang ram a nih avangin ram chhung hmun dang­te nen hmasawnna ruhrel siam kawngah inang tlanga kalpui chi a nih loh thu a sawi chungchangah Mansukh Mandaviya chuan, "India-ah hian ram leilung inang lo tak tak a awm tih hi kan pawm tlan a ngai," a ti a; ram leilung dinhmun azirin hmasawnna tura ruahmanna siam a pawimawh thu a sawi.