YMA member-te politics tui nû inlentir a rem lo - Lal Thanzara

Tuichawng Group YMA chuan Nilaini aṭang khan Vanṭhuampuiah group conference an hmang a; an hun hmanpui­tu minister Lal Thanzara chuan, YMA member-te politics tui nûa an inlentir a rem loh thu a sawi.

Lal Thanzara chuan, "YMA chu ṭanpui ngaite ṭanpui a, mi harsa leh chhumchhiate dâwm kâng a, nunphung dika mipui hruaitu a ni. Missionary-te din a nih avangin YMA hian malsawmna a dawng nasa a, sorkar programme leh policy tihhlawhtlin kawngah pawh a thawh hlâwk hle. Chutih rual chuan, YMA member-te chu politics tui nûa inlentir a rem lo," a ti.

Lal Thanzara chuan, Kumpinu hunlai aṭanga Mizorama awm tawh Chakma leh Bru thlah kal zelte chu ram mi dik tak an ni tih sawiin, "Dan kalha Mizorama lut rute erawh he ramah hian an awm ve a rem lo," a ti a; state ṭhenkhat chu an harh chhuah tlai avangin chîmralin an awm mek tih sawiin, Mizote chîmral an nih loh nan ṭan lak a ngaih thu a sawi.

Mizoram khua leh tui dik takte'n Mizoram lo chu ram dang an nei lo tih sawiin Lal Thanzara chuan, "Zo hnahthlakte lungrual taka kan chênhona atana Pathianin min pek Mizoram humhim a, nuam taka siam hi a chhunga cheng khua leh tui dik takte tih tur a ni a, inngeih loa intai a, inen hrang thei kan ni lo," a ti.

Tuichawng Group YMA Conference hi Central YMA treasurer J Lalsailova pawhin a hmanpui a ni.