Synod EC-in agenda 59 ngaihtuah

Synod Executive Committee (SEC) meeting vawi 267-na chu, February 21-23, 2017 chhung khan Synod Office-a JM Lloyd Hall-ah an ṭhu a, moderator Rev. Lalzuithanga'n a kaihruai. Member 131 an kal a, agenda 59 ngaihtuah a ni.

SEC thu ngaihtuahte zingah hian ram pum huap social media chungchang zirhona buatsaih te, Myanmar-a ram thar rawngbawlna tur kawng zawn te, Synod Hospital-a damlo awmpuitute tana khualbûk sak chungchang te, Mizoram kohhrante inpumkhatna leh thawhhona chungchang, Shillong Mizo Baptist Kohhran nena inremna atana sum mamawh thute a tel.

Nupa chungchang dân leh kohhran pâwl dangte nena kan inkungkaihna dan en ṭhatna te, ruihhlo ngaite hmun khata pawh khâwm dan tur te, Synod Hospital-a doctor-te tana limited private practice kawng hawn rawtna te, All India Sunday School Association (AISSA) nena thuthlung siam chungchang te, Bangalore-a UTC compound-a biak-in sak chung­chang te, ram pum huap zai intihsiakna buatsaih dilna te, Kohhran Pavalai Pawl din ṭan hun zir chian­na chungchangte a tel bawk.