BJP-in Mizoram a hmangaih - BJP

BJP Mizoram Pradesh chuan thu­chhuah siamin, BJP kaihruai sorkar lai­pui­in Mizoram an hmangaih hle niin an tarlang a, "Retheihna khur aṭanga min khai chhuah a tum hi thinlung takin lawm­thu kan sawi a ni," an ti.

BJP chuan, Union minister of state for Road Transport & Highways Mansukh Mandaviya-a'n Mizorama NH-54 chu double lane-a tihlen leh tihchangtlunna atana cheng vbc. 6168 ruahman a nih thu leh dawr dang aia tláwm zawka damdawi zawrhna dâwr Mizoram hmun 25-ah din thar a nih dawn thu a sawi te, lo neitute tana leiṭha awlsam zawka supply a nih dawn thu a sawite chu lawmawm an tih thu an tarlang.

Mizoram BJP chuan, BJP kaihhruai sorkar laipuiin Mizoram an duhsak ang takin, a nihna tur ang taka sorkar laipui aṭanga sum hmuhte hmang turin Mizoram sorkar an phût tih an sawi a, "Mizoram sorkarin a tih tur ti lo a, ram siamna tur sum leh pai dik lo taka an hmang zel a nih chuan a theih ang anga hma lain kan do zel dawn a ni," an ti.