Naupang humhim beihpui thlakna hawng
Aizawl District Child Protection Unit (DCPU), World Vision, SCERT leh Mizoram Primary School Teachers Association (MPTA)-te chuan, nimin khan IPR Auditorium, Aizawlah ‘Hur sualna laka naupangte venhim beihpui thlakna’ hawnna inkhawm an buatsaih a; parliamentary secretary (School Education) Joseph Lalhimpuia'n a hmanpui.
Joseph Lalhimpuia chuan, kum 2012 aṭangin a kum tèlin naupang hursualna lam hawi zawnga khawih chhiat a pun tial tial thu sawiin, "Mizoram population enin thil ngaimawhawm a ni a, National Crime Record-in a tarlan danin, naupang khawih chhiat tamna ber state kan ni hi a pawi hle," a ti a; naupang humhimna kawngah nasa zawka ṭan lak a ṭul thu a sawi.
Parliamentary Secretary chuan, naupang pawisawi lo khuaikhem leh tharum hmanga nunràwnna lantir chu thil huatthlala ber a ni tih sawiin, "Hetiang laka naupang venghim tur hian kan zavaia kan ṭan rual a ngai. Naupangte hi hnam rohlu an ni a, anmahni venhim hi mi tin mawhphurh a ni," a ti.
Lalhimpuia chuan, naupang khuaikhemtu tam zawk chu naupangin an hriat chian leh an rin em emte an nih ṭhin thu a sawi a; zirtirtute'n naupang humhimna kawngah mawhphurhna thui tak an neih thu sawiin, zirtirtute chu an naupangte hre chiang a, harsatna an sawi ngamna nih tum turin a chah. Naupang khawih chhiat chu thil pawi tak a nih avangin mi tinin an huat a, inbiakremnaa inngaihdam mai mai lo turin mi tinte a chah bawk.
Beihpui thlak hawnna inkhawm hi Aizawl DCPO James Lalthangmawia, CWC member-secretary ni bawkin a kaihruai a, zirtirtu ṭhahnem tak an tel. SCERT deputy director Sangzuali Vanchhawng, advocate Lalfamkimi, protection officer Lalrempuii Fanai leh Aizawl Shelter Home-a counsellor Ennet B Lalthlengliani ten thil pawimawhte an zirtir a ni.
Inkhawma Child Welfare Committee (CWC) report an tarlan danin, kum 2012-13 khan naupang khuaikhem case 62 a awm a; kum 2013-14 chhungin case 71, kum 2014-15 chhungin case 136, kum 2015-16 chhungin case 182 awmin, sorkar kum kal mekah Juary 2017 thlengin case 147 a awm tawh bawk.