Myanmar MP-te leh CM an inkâwm

Myanmar MP leh political party hruaitute chuan, February 22, 2017 tlai khan chief minister Lal Thanhawla a bangla-ah an kâwm a; Chief Minister chuan Mizoramin remna leh muanna a neih dan a hrilhfiah.

Myanmar MP-te'n Mizoramin remna leh muanna a neih dan leh chuta tana kawng a zawh dante an zawhna changin Lal Thanhawla chuan, "Mizoram buaina kha politics buaina a nia, silai thiltihtheihna leh sipai chaknaa senghawi chi a ni lo a, politics bawka senghawi tur a ni tih hriaiin, remna leh muanna a awm theih nan eng chen pawh ke pên inhuamin theihtawp chhuahin hma kan la a, remna leh muanna kan nei thei ta a ni," a ti.

Chief Minister chuan, sorkar laipuiin hmarchhak state-te a ngaihsak tawh hle nia sawiin, "Sorkar reng rengin hmarchhak tan nasa takin thawh an inhuam a, ṭan an la mek. Kaladan Multi Modal Transport Transit Project puitlin hun Mizoram leh ram pumin a nghakhlel a, he project atan hian India-in Myanmar sorkar chu kawng hrang hrang a ṭanpui mek a ni," a ti a; project hlâwkna chu Mizoram leh hmarchhak state dangte'n an tèl tur thu a sawi.

Myanmar MP Oo Hla Saw chuan, India chu khawvela democracy ram lian ber leh hlawhtling pawl ber a nih angin India rama federalism kalpui dante zir tura lo kal an nih thu a sawi a, "Mizoramin kum 20 chuang buaina leh tawrhna paltlanga remna leh muanna a neih dan te, remna a awm theih nana a kawng zawhte hi kan ramah a hman ve thei dawn em tihte rawn zir chian kan tum a ni," a ti.