Kawng laihna senso leh laih zat a pung?

Mizoram leh Assam-in ramria buaina a neih hnua ramria kawng laih zat nia Kolasib DC pisa lamin an sawi chu a pung a, senso zat pawh RTI Act hmanga zawhna chhanna leh tun hnaia an sawi a inthlau hle.

Ramria kawng laih zat hi April 2022 thla tìr lama thuneitute hnena thuthar thehdarhtute’n an zawh chuan an la sawi thei lo a, km. 100 chuang hret niin an sawi. Chutih laiin, Kolasib DC pisaa thawkte chuan tun hnai khan ramri hnaih khuate hmasawnna tur leh ramria Mizoram police duty camp panna atan kawng thar km. 205-a thui laih a nih thu an sawi thung.

Kawng laihna atana senso chu RTI Act hmanga zawhna chhan a nih dan chuan, kawng laih hna chu hlawm thumah ṭhen a ni a, hlawm khatna (Phase-I)-ah kawng laih man cheng nuai 200.4 thehluh a ni a, bill pek vek a ni tawh.

Hlawm hnihnaah chuan kawng laihna senso cheng nuai 507.30 a ni a, cheng nuai 152.19 pek tawh niin, la pek loh cheng nuai 355.11 a la awm. Hlawm thumnaah chuan kawng laihna bill cheng nuai 1,248.85 a lut a, a vaiin sorkarin a la bá a ni.

RTI hmanga zawhna chhannaa a lan danin, kawng laihna atana bill thehluh zawng zawng chu cheng vbc. 19.56 a ni a, kawng laih man pek tawh zat chu cheng vbc. 3.53 niin, la pek loh chu cheng vbc. 16.03 a awm.

Hetih lai hian, tun hnaia Kolasib DC pisaa thawkte sawi dan chuan, ramri hnaih khuate hmasawnna tur leh ramria Mizoram police duty camp panna atana kawng thar km. 205-a thui laihna atan Mizoram sorkarin cheng vbc. 21.08 a pe (sanction) thung.

Sorkarin kawng laihna atana JCB leh Hitachi a hmansak neitu pakhat chuan, “July 2021-ah kan khawlte kawng lai turin ramri-ah an lut ṭan a, a tam zawk chuan December 23, 2021-ah ramri an chhuahsan. Hetih lai hian, record-ah chuan July-December 2021 chhunga kan hnathawh ai hian kan chhuah hnu thla thum vela khawl tlem zawk hmanga an hnathawh a tam zawk daih,” a ti.

Khawl neitute chuan, an khawlte chu ramria inkalpawhna kawng kaihhnawih bak pawh thawhtir an nih thu sawiin, thuneitute’n khelmual laih hnate an thawhtir thu Vanglaini an hrilh bawk.

Kolasib DC pisaa thawkte sawi danin, khelmual an laih zawng zawng chu a sei zawng metre 994.22 leh a zau zawng metre 599.788 a ni.