Samthang Zopui Phûl chungchang Management Committee-in an sawifiah
Samthang Zopui Phul Management Committee chuan May 23, Thawhṭanni khan Samthang Zopui Phûl (Nature Park) chungchang leh sum hman dante sawifiahna an tichhuak a; Zopui Phûl siam hna chu Champhai DC hlui Maria CT Zuali thawh a ni lo tih an tarlang.
Social media-a thu léng
Samthang Zopui Phûl Nature Park chungchangah hian thu chi hrang hrang sawi a awm ṭhin a; kar liam taah pawh 'Ruatfela Nu' tih hmingin social media-ah thu thehdarh a ni. Hetih lai hian, Vanglaini palai zawhna chhangin Ruatfela Nu tia hriat lâr Vanramchhuangi chuan, Ruatfela Nu tih hminga thu thehdarh chu ama ziah a nih loh thu a sawi.
Ruatfela Nu tih hminga thu thehdarh thupui chu, 'DC ni chunga Samthang Zopui Phul Nature Park cheibawlna NEC aṭanga project crore 3.80 a mimala dawng thei Maria CT Zuali'n transfer a nih hnuah pawh Champhai DC kuta hlan tel loin a thawk zui zel,' tih a ni.
Thu thehdarha tarlan danin, Samthang Zopui Phul project chu tender tur tih a nih laiin tender loin Maria CT Zuali'n a nau nen an thawh thu te, Champhai DC aṭanga transfer a nih hnuah additional secretary ni chungin a thawh zui zel thu te, Aizawl lama a ṭhuihhruaite nen sorkar motor a kawlin vawi tam tak an kal thu te, project chu mimala hmuh ni loin DC Office hminga hmuh a ni a, Champhai DC aṭanga transfer a nih hnuah pawh DC charge latu hnenah hlan tel loin ama'n a thawh zui zel thu te, hna vilin Champhai DC a nih lai leh transfer a nih hnuah vawi 50 vel Samthangah a kal thute tarlan a ni.
Management Committee thu
Social media-ah thu thehdarh a tam avangin Samthang Zopui Phul Management Committee chuan May 23, 2022 khan sawifiahna an tichhuak a; project chu tender tur ni mah se, NEC-ah tender loha community base (vantlang)-a thawh tura dil a nih thu tarlangin, "Hetianga kan ruahman nachhan hi tourism hlawhtlinna tur atan mipui kutkawih ngei a nih a ngai a, post Covid-in ei leh bar a tih harsat avangin mipui inhlawh nana dil a ni," an ti.
Management Committee chuan, Zopui Phûl thawh zawh thawkhat tawh a nih avangin February 25, 2022 khan Champhai DC Maria CT Zuali'n a hawn tawh thu tarlangin, "Assets-te hi Zopui Phul Management kuta hlan vek a ni a, Pi Maria CT Zuali hna a ni lo a, he project hnuaia hna chi hrang hrangte min enpuiin ruahmanna min siampui mai zawk a ni," an ti a; sum hmanna zawng zawng enfiah theih vek a nih thu an tarlang.
Samthang Zopui Phul Management Committee chuan, Zopui Phûl project an nei chu an lawm thu te, buaipuisaktu Maria CT Zuali chungah leh NEC chungah leh Chief Minister chungah an lawm thute an sawi a; chutih laia thil hre chiang loa a nihna bâk bâka thu leh hla a awm ṭhin chu pawi an tih thu an tarlang bawk.
Zopui Phul Management Committee thuchhuakah hian chairman PC Lalruatkima leh secretary JH Laldinliana te hming a chuang a ni.
Sorkar press release
Samthang Zopui Phûl (Nature Park) hi NEC aṭanga sum hmuh hmanga siam niin, April 2021-ah cheibawl ṭan a ni a, February 25, 2022 khan Champhai bawrhsap Maria CT Zuali'n a hawng.
Zopui Phûl hawn chungchang hi February 25-a sorkar (IPR) thuchhuahah pawh a tel a; hawnna inkhawmah Maria CT Zuali chuan, Zopui Phul chu khualzinte hîp thei tura cheibàwl nan Mizoram sorkar kaltlangin NEC-ah project thehluh a nih thu leh Chief Minister-in a ṭul anga a bawhzui thute a sawi.
Sorkar thuchhuah tarlan danin, project-in a ken tel langsar zingah - a panna kawng siam, Dilpui tuikhuah leh dîla lên velna lawng, chhungkaw paruk tan homestay, eco toilet, log cabin, eco-cafeteria, camping & hiking equipment, orchid house, propagation centre leh bazar shed-te a tel. Project-in a ken tel hmasawnna ruhrel dangte thawh chhunzawm zel tur a
ni bawk.
Samthang VCP thu
Samthang VC president C Lalrintluanga chuan kumin March thla khan Zopui Phûl siam chungchang sawifiahna a lo ziak tawh a; mi ṭhenkhatin thu dik hrûla rin thu an sawi chiam bakah, Assembly House-ah sawi chhuah a nih avanga sawifiah a nih thu a tarlang.
Samthang VCP tarlan danin, Zopui Phul cheibâwlna atan NEC aṭangin cheng nuai 359.21 hmuh a ni a, anmahni maia buaipui turin an tlin loh avangin Champhai DC Maria CT Zuali an bêlbul a ni.
Project chu tender chhuah tur a ni tih an hriat rualin, tender chhuah loha community base-a an thawh theih nan hma lakpui turin Champhai DC an ngen tih sawiin C Lalrintluanga chuan, "Kan beisei leh duh dan ang ngeiin tender chhuah a ni ta lo a, kan lawm hle a ni," a ti a; tender chhuah ni se, an thawh zinga tam tak chu an thawh theih a rin loh thu a sawi. Sumte chu bialtu BDO kaltlanga lak ṭhin a nih thu a tarlang bawk.