CHA-a CT scan leh oxygen plant hawn a ni ; Doctor indaih lohna a nasa - Health Minister

Civil Hospital, Aizawla (CHA) CT Scan khawl leh Oxygen Plant bun thar chu nimin khan Health & Family Welfare minister Dr R Lalthangliana'n a hawng a; doctor indaih lohna a nasat thu a sawi.

Doctor's Seminar room-a hawnna inkhawmah Dr R Lalthangliana chuan, nikum leh kuminah doctor eng emaw zat pension-a an chhuah thu sawiin, "Tun dinhmunah nasa takin doctor indaih lohna kan nei a, lâk belh zung zung theih a ni si lo," a ti.

Health Minister chuan, CT Scan khawl rei tak a chhiat ṭhin thu sawiin, "Opposition party kher lo pawhin an sawisel ṭhin. Technical thil a ni a, zan hnih khat leka repair theih a ni lo. Mipuiin min hrethiam hrâm ṭhin a ni," a ti a, CHA-in CT scan khawl thar a nei chu lawmawm a tih thu a sawi.

Mizoramah health infrastructure tichangtlung tura hmalakna leh hmachhawpte sawiin HFW Minister chuan, "Tunah chuan khawl ringawt a ni tawh lo, thawktu neih a ngai. Thawktu lak belh turin theihtawp chhuah mek a ni," a ti.

Khualzahawm Health & Family Welfare Board vice chairman Dr ZR Thiamsanga, MLA pawhin thu sawiin, Health department-in hmuh theihin hma a sawn niin a sawi a, "A hmu leh a hre chiang tan chuan kan sorkar hi fak tham a ni. Tunah chuan pawimawh ber chu thawktu neih belh a ni," tiin, tun aṭanga rei vak loah thawktu an indaih deuh tawh a beisei thu a sawi.

Health & Medical Education director Dr T Lalhmangaihi tarlan danin, CT Scan khawl thar chu cheng vbc. 2.37 man a ni a, a leina sum chu NESIDS aṭanga hmuh a ni. CT Scan khawl thar hi CHA-a a pathumna a ni a, a hmasa ber chu September 12, 2003-ah bun niin, kum 10 vel hman a nih hnuah August 2013 khan a thar bun a ni.

CHA-in oxygen plant a neih hmasak ber chu kum 2008-ah bun niin, 150 LPM a ni a, chumi hnuah NEDP hnuaiah kum 2017-18 khan 200 LPM bun leh a ni. Nimina hawn tâk chu 500 LPM a ni a, NESIDS aṭanga sum hmuh nuai 92.91 hmanga bun a ni. Bun hmasak, 200 LPM chu a la hman theih a, bun thar 500 LPM nen ṭha takin CHA châwm zo tura ngaih a ni.