Bawlhhlawh aṭanga siam leiṭha vailiam

Solid Waste Management Centre, Tuiriala bawlhhlawh paih ṭawih thei aṭanga leiṭha siam chu, nimin khan Aizawl mayor Lalrinenga Sailo-in Aizawl Municipal Corporation (AMC) pisa kawt aṭangin a vailiam. Leiṭha (AMC Compost) vailiam tak hi ip 100 (kg. 2,000) a ni a, Kolasib tlangdunga hralh tur a ni.

Lalrinenga Sailo chuan, “AMC-in Solid Waste Management Centre enkawl nan duhthusamin mihring leh sum leh pái a nei lo a, mawhphurhna pek kan nih si avangin chonaah ngaiin bawlhhlawh sâwngbàwl mawhphurhna kan la a ni,” a ti.

Aizawl Mayor chuam, bawlhhlawh aṭanga leiṭha siamte a taka an hralh chhuak thei ta chu lawmawm a tih thu a sawi a; AMC leiṭha chu laboratory-a endik vek a nih thu te, loneitu leh leiṭha mamawhtute tan a ṭangkai a beisei thute a sawi bawk.

Leiṭha vailiamna inkhawm kaihruaitu AMC executive councillor Laltlanzova Khiangte chuan, AMC-in January 20, 2022 aṭangin Solid Waste Management Centre a enkawl ṭan thu leh bawlhhlawh ṭawih theite leiṭhaa siam turin Waste Tech and Bio-Energy, Ramhlun North an thawhpui thu a sawi.

Laltlanzova Khiangte chuan, “Vawiina AMC leiṭha hralh chhuah hmasak ber hi ip 100 (kg. 15 & kg. 25) a ni a, a duh apiang tana lei theih turin rei lo têah AMC pisaah pho chhuah a ni dawn,” a ti. Leiṭha kg. 15 ip chu Rs 150 man leh kg. 25 ip chu Rs 250 man a nih dawn thu a sawi bawk.