Doctor sawn chhuak lo turin ngen

Lai Students Association (LSA) chuan, Lawngtlai District Hospital-a doctor pahnih, thlaktu awm loa sawn chhuah chu an duh loh thu an tarlang a, transfer order sût emaw, an aiawhtu tur dah nghal emaw turin Mizoram sorkar an phût. Doctor sawn chungchangah hian MLA C Ngunlianchunga'n Chief Minister lehkha a thawn bawk.

Mizoram sorkar chuan May 20, 2022 khan doctor 10 chuang sîksawina thupek a tichhuak a, chu'ng zingah chuan Lawngtlaia doctor pahnih - Dr Andrew Kawlthangpuia leh Dr Paul Lalchungnunga te pawh telin, Lawngtlai aṭanga sawn chhuah tura tih an ni a, anmahni thlâktu tur dah a ni lo.

LSA chuan thuchhuah siamin, doctor indaih lohna a nasat em em lai leh doctor leh thawktu dang dah belh tura dilna Mizoram sorkarah thlen a nih mek laia doctor awm sa pahnih, thlaktu tur dah loa sawn chhuah tum a ni chu hriatthiam harsa an tih thu an sawi a, "Kan neih chhunte an aiawh dah loa lak chhuah tumna awm mek hi sût emaw, an aiawh dahna emaw siam turin sorkar kan ngen a ni," an ti.

LSA hian Lawngtlaia doctor pahnihte chu sorkarin an aiawhtu tur a dah hma chuan Lawngtlai chhuahsan lo turin an hriattir a; doctor transfer & posting sîksawi hrim hrim an dodal loh thu an tarlang bawk.

Hetih lai hian, doctor sawn chungchangah hian Lawngtlai West bialtu MLA C Ngunlianchunga chuan Chief Minister leh Health Minister hnenah lehkha a thawn a; Lawngtlai damdawi-ina doctor leh nurse indaih lohna phuhru tura vawi tam tak a lo ngen tawh thu leh Assembly House-ah pawh a auchhuahpui tawh laia doctor pahnih a ruala sawn chhuah a ni chu lungchhiatthlak a tih thu leh ram leh hnam ang pawha inngaih pawimawh loh thlâk a tih thu a tarlang.

Lawngtlai West MLA hian Lawngtlaia doctor pahnihte chu sawn chhuak lo a, an awmna tura tih damdawi-inahte chuan hmun dang aṭanga dah mai turin a ngen a ni.