Sorkar hnathawkte DA pung pek leh pension kum tihsan PC-in ṭha an ti

Peoples Conference party president Lalhmangaiha Sailo chuan, sorkar hnathawk pawl hrang hrang intél khawmin dearness allowance (DA) pung pe tur leh sorkar hnathawkte pension hun kum 62 ti tura Mizoram sorkar an ngen chu ṭha an tih thu a sawi.

Lalhmangaiha Sailo hian nimina an party pisaa PC party office bearer-te ṭhutkhawmnaah thu sawiin, "Federation of Mizoram Government Employees and Workers (FMGEW)-in DA pung an ngen hi an dikna chanvo a nih avangin PC party chuan a àwm kan ti a, tihhlawhtlinsak turin Mizoram sorkar kan ngen. Sorkar hnathawk pension kum atana kum 62 hman ngenna leh rawtna awm pawh hi a ṭha kan ti a ni," a ti.

Mizoram sorkar hnuaiah thawktu indaih lohna a awm tih sawiin PC President chuan, "Chutih laiin, dinhmun pawimawh tak tak chelh, a nghet loa hun rei tak tak thawk tawh, mithiam leh hman tlak, hna thawktu ber ber ni chunga dinhmun derthâwng taka awm tam tak an awm. Thawktu indaih lohna leh a nghet loa thawkte tana a ngheta thawhna kawng hawng tur hian sorkar department kalphung siamṭhat a ngai kan ti," a ti a; sum harsatna leh revenue expenditure sang lutuk avangin thawktu indaih lohna phuhru tur leh a nghet loa thawkte dah nghet turin sorkarin hma a la hlei thei lo tih a sawi.

Nimina PC party office bearer-te ṭhukhawm hian an hmalak dan tur chi hrang hrang an rél a ni.