Chakma-te ram pek chungchang Central YMA-in bawhzui an rêl

YMA Central Executive Committee chu May 23, Thawhṭanni zan khan Central YMA Committee Room-ah an ṭhu a; Mamit district-a Pûkzing khaw rama Chakma-te ram pek tum nia social media-a lang chu bawhzui an rêl.

Central YMA chuan Mizoram electoral roll leh Bru chungchang an ngaihtuah a, “NGO Coordination Committee-in March 10, 2022-a Election Commission of India hnena Mizorama Tuikuk awm, anmahni duh thu ngeia Tripura ram chhunga awmte Mizoram electoral roll aṭanga paih tura ngenna an lo thlen chuan rah ṭha chhuahin, tun hnaiah Tripura sorkarin an state electoral roll lama an dah ngheh dawn tak avanga electoral roll-a an awmna hmasa Mizoram electoral roll aṭangin mi 207 paih an nih thu dawn a ni,” an ti a, lawmawm an tih thu an sawi.

CYMA hian kumin YMA Day pualin home, centre, camp hrang hrangah thilpek pek an rél a; YMA Day thupuiah YMA kumpuan hmang ṭheuh tur leh YMA Day pualin ṭanpui ngaite ṭanpui tur leh Mizo nun ze mawi inzirtir kawnga hma la turin YMA branch, group leh sub-headquarters-te an ngen. YMA Day zing dar 7-ah branch tinah YMA aurinna hmangin ‘Ro min relsak ang che’ tih hla, YMA Zaipawlin an sak chu zaitir ṭheuh ni se, an ti.

CYMA leh Samagra Shiksha thawh dunna kum hnih chhung atana thuthlung duan chu an pawm a; thawh dunna thuthlung hi nimin khan School Education Minister pisaah an ziak thar leh nghal a ni. Ṭhutkhawmah hian ruihhlo do chungchang an sawiho bawk.