KHAWTHLIR

Aizawlah Jardosh
Railways leh Textiles enkawltu minister of state Darshana Jardosh chuan nimin khan Aizawl a rawn thleng a, tlaiah chief minister Zoramthanga nen an inkawm nghal. Union Minister hian Thenzawla puan tahna hmunpui bakah a enkawl ministry kaihhnawih hmunhmate a tlawh dawn nia thu dawn a ni.

Thisen pe
YMA, Kolasib Ṭumpui Branch chuan nimin khan thisen pek an huaihawt a, Kolasib District Hospital tan thisen unit 21 an pe a, petute mipa 18 leh hmeichhia pathum an ni.

HSSLC result
MBSE chuan May 31, 2022, kar leh Thawhlehni khian chhun dar 12-ah Higher Secondary School Leaving Certificate (HSSLC) Examination 2022 result a tichhuak dawn. Result hi Chaltlanga MBSE pisa leh website - www.mbse.edu.in ah en theih a ni ang.

Zirlai thlah
T Romana College chuan nimin khan Vanapa Hall-ah zirlai chhuakte thlahna hun an hmang a, zanah an college-ah zanriah an kîlho. T Romana College aṭang hian BA zo thar mi 401 an awm a ni. Nimin vêk khan J Buana College, Lunglei pawhin an zirlai BA zo thar 107 thlahna hun an college-ah an hmang bawk.

TB inzirtir
National TB Elimination Programme chuan nimin khan RBSK, RKSK leh National Tobacco Control Programme hnuaia thawkte tan training an buatsaih a, vawiinah an chhunzawm ang. Training hi Hospital and Medical Education auditorium-ah buatsaih a ni.

Sarâng thianfai
India zalenna kum 75-na lawmna, Azadi ka Amrit Mahotsav pualin Vaivakawn Branch YMA chuan nimin khan hman khat daih sarâng (single use plastic) thenfai hnatlang an nei a, mi 150 chuang thawk chhuak.

Kraws Crusade
Synod Theological Education Board chuan zanin aṭang hian Dawrpui Presbyterian Kohhran biak-inah ‘Live Kraws Crusade-2’ an buatsaih dawn a, May 29, Pathianni zan thleng a awh ang. Zan dar 7-ah inkhawm ṭan a ni ṭhin dawn a, Pathianniah chuan chhun dar 1:30-ah inkhawm a awm tel dawn. Inkhawm hi TV-ah live-a pek chhuah a ni ang.