Minister-in BDO-te ṭan la turin a chah

Rural Development minister Lalruatkima chuan, nimin khan State Institute of Rural Development/State Panchayat Resource Centre, Durtlangah block development officer (BDO)-te tana intuaitharna, Refresher Training Course a hawng. Minister chuan, BDO-te chu sorkar leh ram tan theitawp chhuah turin a chah.

Training hi SIRD director Lalhmunsanga Hnamte-in a kaihruai a; Lalruatkima chuan, state civil service-te chu state hmasawnna leh hma lam hun atan pawimawh bik an nih thu sawiin, "Sorkarin policy te, department hrang hrang kaltlanga hmachhawpte hlawhtlinna atana thawktu chu sorkar hnathawkte an ni. Sorkar ṭha leh chak nei turin policy leh sorkar kal dan tur duangtu legislator-te an pawimawh em em rualin, a bawhzuitu sokar hnathawkte'n mawhphurhna sang tak in nei tih in hriat thar leh ka duh," a ti.

RD department sorkar laipui scheme hrang hrang kalpui tam ber a nih thu sawiin Minister chuan, "Mipui rawngbawltu in nih ang ngeiin nangmahni dâwrtu apiang tana biak nuam leh hawihháwm, sorkar fawng vuantu apiang tana thawhpui theih, mipui tana rin ngam, sorkar leh ram tana theihtawp chhuahtu, mi rinawm leh taima, ram tana fa hrin manhlâ ni ang che u," a ti a; Pathian leh ram tana thawk an ni tih theihnghilh lo turin a chah.

Training hi May 27, 2022 thleng neih tur a ni a, BDO 26 an tel. Sorkar laipui scheme hrang hrang hriat zauna leh bihchianna bakah, thupui thlan bik hmangin mi thiamte'n an zirtir dawn a ni.