Covid-19 vei an pung leh hret

May 23, Thawhṭanni khan Mizoramah Covid-19 vei mi 45 hmuh chhuah a ni, hripui vei an pung leh hret. Nimin khan hripui vei dam tawh mi 16 chhuahtir an ni a; hripui vanga thi an awm lo a, kumin May thlaah mi pahnih chiah thi an la awm.

Thawhṭannia hripui vei hmuh tharte chu mipa 22 leh hmeichhia 23 an ni a; RAT hmanga hmuh chhuah 43 leh FIA hmanga hmuh pahnih niin, positivity rate chu 12.61% a ni. Lunglei district-a Buarpui khuaah mi 11 hmuh chhuah a ni a, hmuh tamna ber khua a ni.

IDSP record angin, Mizoramah Covid-19 vei 2,28,182 hmuh chhuah a ni tawh a, mipa 1,06,238 leh hmeichhia 1,21,944 an ni a, mipa aiin hmeichhia 15,706-in an tam zawk. Nimin tlai dar 5 thleng khan mi 2,27,339 (99.63%) chhuahtir an ni tawh a, mi 698 (0.31%) thi tawhin, enkawl mek mi 145 (0.06%) an awm.

Nimin khan Thawhṭanni aiin Mizoramah hripui vei enkawl lai an tam leh hret a, active case tamna ber Aizawl district-ah mi 42 an awm. District pathum - Siaha, Champhai leh Lawngtlai district-ah hripui vei an awm rih lo thung.