KHAWTHLIR

Mizoram chief information commissioner (CIC) hmasa ber Robert Hrangdawla, IAS (Rtd) chu June 22, Thawhṭanni zing dar 4:20 khan a thi a, Thawhṭanni chhun dar 12-ah vui a ni. Kum 76 mi Robert Hrangdawla hi sorkar hna aṭanga a pension hnuah Mizoram CIC a ni a, July 5, 2006 aṭanga February 1, 2010 thleng CIC a ni.

Ṭhasiama Se No Neihna, Chawngtui East chu June 22-a lir­nghing avang khan a khi a, hei vang hian hun eng emaw chen chu tlawh theih a ni dawn lo tih thu Chawngtui East VC leh YMA-te chuan an chhuah.

Brig (Rtd) BS Gill, Punjab chuan Mizorama lirnghing tuarte ṭanpuina atan CM Relief Fund-ah Rs 50,000 a rawn thawh; Mizorama Covid-19 dona atan CM Relief Fund-ah hian Rs 1,00,000 a lo thawh tawh bawk.

Kolasib Volunteer Group chuan nimin khan ramria duty-te hâk atan Kolasib DC hnenah rain coat 65 an hlân. Raincoat ṭhuina tur hmanrua Kolasib DC office-in a tum a, Volunteer Group hian an ṭhui a ni.

Mizoram Civil Service Association (MCSA) chuan Covid-19 hripui dona turin Chief Minister’s Relief Fund-ah Rs. 16,47,640 an thawh a, nimin khan chief minister Zoramthanga hnenah an hlàn. MCS officer-te'n an hlawhpui (basic pay) aṭangin 10% an thawh a, pension tawhte pawh an tel. MCSA hian March 2020 khan Covid-19 dona atan Rs. 6,30,650 an lo pe tawh bawk.

MJA, Mamit District president PC Lalthan­zuala te chhungkua chuan Mamit khawpuia quarantine centre 11-a awm mekte tan tui thiang­hlim (mineral water) báwm (case) 70 an pe a, nimin khan quarantine centre hrang hrang­ah an sem kual a ni.

Serchhip bialtu MLA Lalduhoma chuan nimin khan a bial chhunga damdawi-in pahnih - Ser­chhip District Hospital leh Thenzawl CHC-ah personal protective equipment (PPE) full set (gown & jump suit, glove, mask, etc.) 300 a hlân. PPE hi Serchhip damdawi-inah 220 leh Thenzawl damdawi-inah 100 a pe a ni.

North Mualcheng Farming Cooperative Society chuan, Rajya Sabha MP atana thlan thar, an khaw chhuak K Vanlalvena lawmpuina atan tuna a awm mekna Bawngkawna quarantine centre-a awmte tan chawhmeh leh thei eng emaw zat nimin khan an hlân.

Legislative Assembly speaker Lalrinliana Sailo chuan June 22, Thawhṭanni khan a bial, Chal­filh constituency-a khaw hrang hrangah buhfai, PPE, hand sanitizer, hmai tuamna, silpauline leh khawtlang mamawhte a pe.

Lunglei HPC vice chairman Lawmawma Tochhawng, MLA chuan nimin khan a pisaah pianphunga rualbanlo mi pathum hnenah HPC Relief Fund aṭanga lei wheelchair a hlân.