Sa ei tura intodelh turin i tang ang u - CM Lal Thanhawla

Chief minister Lal Thanhawla chuan, Mizote chu sa ei hnam kan ni a, saa intodelh tuma theihtawp chhuah a ṭul thu a sawi.

Mizoram Veterinary Service Association (MVSA)-in Thenzawl Farm Venga AH&Vety Farm Complex-a Annual General Conference vawi 33-na an neih a hmanpuinaah Chief Minister chuan, Mizote chu sa ei hnam kan ni chungin kan intodelh lo hle tih a sawi a; saa intodelh theih dan tur ngaihtuaha hmalak chu AH & Vety department-a thawkte tan chona a nih thu a sawi.

Lal Thanhawla chuan, NLUP-ah mi tam takin ran vulh an thlang tih sawiin, patling, mahni tuina zawng ran vulha a ngaihna hre lo tak tak, kaihhruai ngai tam tak an awm tih sawiin, Vety officer-te chu ran vulhtute puih kawngah ṭan la thar turin a fuih.

Chief Minister chuan, mi tinin an tih tur ṭheuh rinawm leh taima taka an tih a ngaih thu sawiin, "Kan ramah thil engkim a ṭha duh a, hnam intodelh, India ramah model state, Pathian chawimawitu kan ni thei," a ti.

Tunlaiin Mizoramah dil tur hriat leh dil nacháng hriat chu chang­kanna leh finna emaw ti an tam tih sawiin, pawi a tih thu a sawi a, "Sum hi a zawna zawn chhuah chi a ni lo a, a thawha thawh chhuah chi a ni zawk," a ti.

Chief Minister Lal Thanhawla hian Vety Farm-a General Manager quarters sak thar a hawng nghal a ni.

Khualzahawm, AH&Vety minister C Ngunlianchunga pawhin thu sawiin, MVSA-te'n sorkar aṭanga duhsakna an chante chu káa lawmthu sawiah tawp loin, an hnathawhah lang se a duh thu a sawi a; Vety officer-te chu sorkarin a dahna apiangah lungawi taka awm zel turin a chah.

MVSA-ah hian Vety doctor 103 an awm mek a; nimina an inkhawmpuiah hian chawhma lamah an president Dr Lalhming­thanga kaihhruaiin rorel inkhawm neih a ni.

An thurel zingah, MAHVS Service Rules 2016-a junio administrative grade leh a chung lama kaisang tura feeder post-a kum hnih awm ngai tih chu tibo tura hmalak te, Chief Minister's Relief Fund-ah Rs. 1,00,000 pekte a tel.