CSS Hindi zirtirtute'n nawrh zui zel an tum

Centrally sponsored scheme (CSS) hnuaia Mizo­rama Hindi zirtirtute chuan nimin tlai thleng khan lungawi lohna an la lantir zel a; an thawh chhun­zawm zel theihna tura thu lawmawm an hmuh hma chuan nawrhna an kalpui zel dawn tih an tarlang.

Mizoram CSS Hindi teachers Association (MCHTA) hian sorkar aṭanga thu lawmawm hmuh nghak­in February 23, 2017 aṭang khan Chief Minister bangla luhna gate bulah an pung­khawm a; sit-in demon­stration hi zanah pawh an chhunzawm zel a ni.

Ningani zanah khan tlaivara ṭhut tum mah se, Chief Minister-in February 24 zingah a hmuh theih tur thu a sawi avangin zan dar 12 velah an ṭîn darh.

Nimin khan CM Lal Thanhawla chu MCHTA hruaitute'n an hmu a, an harsatnate an thlen. Chief Minister chuan, hlawh an hmuh theih nan leh an thawh chhunzawm zel theih nan sorkar laipuiah theihtawpin ṭan an la tih a lo hrilh a ni.

MCHTA chuan nimin khan thuchhuah siamin, Chief Minister-in an service chungchangah sorkar laipuia theihtawp a chhuahpui avangin lawmawm an tih thu an tarlang a, "Chief Minis­ter-in hmalakna kalpui mek a ni tih a sawi hi ngaihchan phawt ni se kan ti a, kan service atana thu lawmawm kan hmu lo a nih chuan theihtawpin hma kan la chunzawm zel ang. Kan service chhunzawmna tura thu lawmawm kan hmuh hma chu kan nawrhna hi kan kal tlangpui zel dawn a ni," an ti.

MCHTA chuan, Februa­ry 23, 2017-a Chief Minister-in media hmaa thu a sawiah, sorkar laipui aṭanga zir chiangtute'n Mizoram CSS Hindi teacher-te vangin zirlaite’n Hindi an thiam phah lo tih an hmu chhuak tia a sawi chungchangah, hriat sual palh a nei nia an hriat thu an sawi a; sorkar laipui aṭangin zir chiangtu an lo kal an hriat loh thu leh Chief Minister thu sawi chuan an rilru a tihnat thu an sawi bawk.