Zorama leh Dr Thangtea thubuai Court-a ngaihtuah hun sawn a ni

Chief minister hlui Zoramthanga leh minister hlui Dr R Lalthangliana te thubuai chu nimin khan Court-ah ngaihtuah tur a ni a; nimahsela a hun sawn ve ve a ni.

Zoramthanga'n Aii Pûk chungchanga thu­buai a neihah nimin khan Special Court chuan thu­hretu pathum a ko a, an inlan loh avangin thuhretu pathumte chu March 23-a inlan tura koh leh an ni.

He thubuaiah hian thuhretu mi 30 an awm a, an zinga pariat chu Court-ah an inlan tawh.

Hetih lai hian, Zoram­thanga thubuai dang, sum lak luh leh thil neih inmil lo (disproportionate assets) chungchangah chuan Special Court chuan March 24, 2017-a inlan turin thuhretu pa­thum a ko. He thubuaiah hian thuhretu mi 26 an awm a, Court chuan tumah a la ko lo.

Dr R Lalthangliana thubuai, disproportionate assets-ah Anti Corruption Bureau (ACB) chuan Special Court-ah charge­sheet an thehlut tawh a; chargesheet hi ngaihtuah zui zel tlak a nih leh nih loh ngaihtuah hun atan nimin kha ruat ni mah se, ACB lamin tihfel tawk loh an neih avangin a hun sawn a ni.

Additional public pro­secutor (APP) H Lal­muan­kima hnen aṭanga Vanglaini thu dawn danin, ACB lamin chargesheet-ah thil tihsual palh an nei a, a dik lo anga ngaihtuah tlang a nih chuan thil fel lo a awm theih dawn avangin, an dil angin Special Court chuan chargesheet ngaihtuah hun atan March 6, 2017 a ruat a ni.

Dr R Lalthangliana thubuaiah hian thuhretu mi 13 an awm a; H Lalmuan­kima chuan, thuhretu an tam loh avangin Court-a koh zawh thuai theih an nih a beisei thu a sawi.

APP sawi danin, Police-te'n Court-a charge­sheet an thehluhin Court chuan chargesheet chu ngaihtuah zui zel tlak a nih leh ni loh a ngaihtuah phawt ṭhin. Ngaihtuah zui tlaka a ngaih chuan sorkar lam thuhretute koin, an thu sawi duhte a ngaithla a; thubuai neitute ukilin an duh chuan thu an lo zawtfiah ve thei a ni.

Thuhretute koh an nih zawhah thubuai neite chu Court-ah koh ṭhin niin, puh an nihnaa sawi duh an neihte zawhfiah ṭhin an ni a; an thusawi nemnghet turin an duh chuan thuhretu koh Court-ah an dil thei.

Thubuai neite'n thu­hretu an neih chuan Court-ah koh theih a ni a, an sawi duhte sawitir an nih bakah, sorkar ukilte'n an zawh duhte an zawt thei.

Chumi hnuah ukilte chuan Court-ah an duh zawngte an thehlut a, a ṭul dan a zirin Court-ah ukilte'n an duhzawng an sawi leh thei bawk. Chumi hnu lamah chuan thutlukna chu judge-te kutah a innghat tawh a ni.