Bawngkawn-Tuirial kawng an enfiah

Undivided Zemabawk NGO Joint Committee hruaitute leh Aizawl DC, Aizawl SP, PWD (Highway) hotute leh NH-54 Bawngkawn-Tuirial kawng siamtu contractor VRS company hotute chuan nimin khan Bawngkawn-Tuirial kawng an enfiah.

Joint Inspection hi Home minister R Lalzir­liana leh Undivided Zema­bawk NGO Joint Committee ruahmanna anga neih a ni a; ṭha zawk leh chak zawka NH-54 kawngpui siamṭhat hna kalpui a nih theih dan tur chipchiar takin an enho a ni.

Joint Inspection chuan, kawngpui leh kawng­pui sira tuihâwk luan­kawr (side drain) siam tikhaihlak thei tura in sakna bungrua leh dâwr bungrua dahtute chu rang taka thiarfihlim nghal turin an hriattir a; mimal in satu ṭhenkhatin kawngpui level aia sanga side drain an lo tihsan dan leh chinfel dan turte an sawiho nghal.

Kawngpui a tlo theihna tur leh siam uluk bik a ngaihna lai hmunte an chhinchhiah a; kawngpuia tui chhia leh ruahtui paih ṭhinte chunga hmalak dan tur an sawiho nghal bawk. Joint Inspection hi vawiinah chhunzawm leh a ni ang.

Undivided Zemabawk NGO Joint Committee hian February 23, 2017 khan kawng siam thuai phûtin Bawngkawn-Tuirial kawng an dang a; nimin khan tiam chin awm loin kawngpui dan leh tum mah se, February 23 zanah sorkar hotute nen an inbiak rem avangin an ṭhulh a ni.