Siaha district-a tui lakna hmun hnihah hawng

PHE minister Zodin­tluanga chuan nimin khan Siaha district-a Tuipang leh a chhehvel khuate chawmtu tur tui lâk, Tuipang and Sarrounding Villages Water Supply Scheme chu tui lakna lui, Tuisih luiah a hawng. February 23 khan Tongkolong WSS (Solar Pumping) hawn a ni bawk.

Zodintluanga chuan, MNF sorkar kum 10 chhung leh Congress sorkar chhunga PHE hnuaia hma­sawnna awmte chu a inthlau hle nia sawiin, "Sum hai luhna NEC-ah MNF sorkarin pakhatmah PHE tan lak luh an nei lo a, DoNER-ah project pakhat chauh neiin, UDPA-ah an nei lo," a ti a; Congress sorkarah erawh chuan NEC aṭangin PHE department atan sum tam tak an hai lut niin a sawi.

PHE Minister sawi danin, NEC aṭangin Sangau Water Supply Scheme Phase I & II, Bualpui NG & Lungzarhtum WSS, Phuaibuang, Lengpui leh Darlawn tui laknate siam a ni a; DoNER hnuaiah West Phaileng, Bilkhawthlir, Sairang, Bairabi, Saitual, Lawngtlai, Khawbung leh Aibawk WSS-te siam a ni. UDPA hnuaiah Tlabung, Khawzawl, Siaha leh Biate WSS siam a ni a; modern technology hmanga solar pumping siam Tongkolong, Kelkang leh Sekhumahte hawn a nih tawh bakah, Moraichera leh Buangpuiah siam a ni.

Tuipang WSS Phase-I hian Tuipang, Siatlai leh Theiri te a huam a, Phase-II in Tuipang-L, Serkawr, Theiva, Maubawk L & CH, Maubawk Zero-te a huam bakah, Zawngling, Khopai leh Ahmypi ten an chhawr thei dawn bawk. NLCPR (DoNER) aṭanga sum hmuh nuai 941.13 hmanga siam a ni a; Phase I-in mi 11,763 leh Phase II-in mi 15,864 a châwm thei dawn a; mi pakhat tan ni khatah tui litre 40 pek a ni ang.

February 23, 2017 khan Tongkolong Solar Pump Water Supply Scheme siam thar chu hawn a ni bawk a; hawnna inkhawm hi PHE minister-in kaihruaiin, bialtu MLA leh Assembly speaker Hipheia'n a hawng.

PHE Minister sawi danin, ni zung chakna hmanga Tongkolong WSS siam hi Asia khawmualpuia solar water pumping system sang ber a ni.

Tongkolong WSS (Solar Pump) hi NRDWP Central sponsor scheme hnuaiah cheng nuai 207.17 hmanga siam a ni a, a siamtu chu P&V Eastern Agencies, Bawngkawn, Aizawl niin, January 4 - April 27, 2016 chhungin an siam a ni.

Tongkolong khaw mipui 672 châwmtu WSS hian ni khatah darkar 6-8 chhung ni zung chakna hmangin tui a pump thei dawn a, ni khatah tui litre 25,000 a pump chuak thei. Kum khatah power unit 35,600 a siam chhuak thei dawn bawk.