ACCJSU-in NIAS chungchanga an phûtte Sorkarin a tihhlawhtlin ngei an beisei
Aizawl City College Joint Students' Union (ACCJSU) hruaitute chuan, nimin khan Aizawl Press Club-ah thuthar thehdarhtute an kâwm a; NIAS, Kolkata-a zirlaite tana an thil phûtte chu sorkarin an intiam anga an tihhlawhtlin ngei an beisei thu a puang.
ACCJSU president Zodinsanga chuan, an thil phût chungchanga Chief Minister leh Home Minister-te'n an hmaa ṭawngkama hmalak an tumna leh inremna an siam chu an ring tâwk tih sawiin, "Chak takin hma an la tih kan hria a, chak zawka hma la leh zel turin kan beisei. NIAS-a Mizo zirlaite phu tawk chhawmdawlna pek kawngah sorkar hi a intiam ang ngeia chak zawka hma la turin kan ngen nawn a ni," a ti.
ACCJSU President chuan, NIAS-a an zirlaipui harsatna tawk chhawmdawlna pek leh zirna an chhunzawm chungchang sorkarin a ngaihtuah mek chu an en zui zel tih sawiin, "An hmalakna hi kan enzui zel a ni tih sorkar hian min hriatsak se kan duh a ni," a ti a; an zirlaipuite thlavang hauh leh hamṭhatna tura beih kawngah ACCJSU-in a theih ang tawkin hna an thawh zel dawn thu a sawi.
Zirlaite thlavâng hauha an hmalakna ṭawiawmtu leh thlawptu Mizo zirlai leh mipui chungah an lawm thu sawiin Zodinsanga chuan, "Diknaa hma kan lakna leh hma kan lak leh zelna tura theihtawp min chhuahpui a, min thlawp zel turin kan ngen a ni," a ti.
ACCJSU hruaitute chuan, an hmalaknaah poltics inrawlh lo se an duh thu sawiin, "Politics a inrawlh lohna atan inveng reng chungin meeting chuan kan kal dan tur a rel ṭhin," an ti a; politics-a inrawlh lohna atan theihtawp an chhuah thu an sawi.
Zawhna chhangin ACCJSU hruaitute chuan, sorkarin an thil phûtte a tihhlawhtlina an kal zel dan tur chu meeting-in a ngaihtuah zel tur thu an sawi a, "File-te a kal mek a, chutia va nawr bur bur chi-ah kan ngai lo. February 27, 2017 hian Chief Minister nen kan inkâwm ang," an ti.