Kiwi chíngtute hnenah tuikhuah hlan

Chawngtlai khuaa Bualpui rama Khawzawl Horticulture Division-in Kiwi chíngtute tana tuikhuah an siamsak chu, nimin khan Horticulture director R Zotawna'n Kiwi chíngtute hnenah a hlan.

R Zotawna chuan, MGNREGS hnuaiah kut hnathawktute'n an huanah nasa zawka hna an thawh theihna turin hmalak dan awm thei se a duh thu a sawi a; Mizoram páwna Kiwi chînna hmun an tlawh theih dan ngaihtuahpui ṭha a tih thu a sawi bawk.

Horticulture department-a Khawzawl Division hian kum 2015-16 aṭangin Chawngtlai Bualpui ramah Kiwi chînna tihhmasawn nan hma an la ṭan a, a tirah chhung­kaw 25-in bul ṭanin, kum kal mek 2016-17-ah chhungkaw 10-in an belh leh a; tunah hian chhungkaw 35-in Kiwi an chîng mek a ni.

Kiwi chíngtute hnen­­ah hian Horticulture department chuan ṭanpuina chi hrang hrang - thîrlên (GI wire), leiṭha, pipe, thingril man, Kiwi rooted cutting-te an pe a; cheng nuai 12.5 sengin tui litre 2,05,000 dawng tuikhuah an siam­sak. Rural Deve­lopment department hma­laknain a panna kawng metre 650-a thui laih a ni tawh bawk.