State Bank Regional Office-ah Pawisa hlui vbc. 619.30 dah lut

November 9, 2016-a Rs. 500 leh Rs. 1,000 note tihthih a nih hnua pawisa note hluite bank-a dah luh theih hun tawp, December 30, 2016 thlengin State Bank of India, Regional Office-ah pawisa note hlui cheng vbc. 619.30 dah luh a ni.

Vanglaini thu dawn danin, SBI Regional Office hian Mizorama chest branch pakua an enkawl a, chest branch pakuate hian nikum December 30 thleng khan cheng vbc. 619.30 an dah lut a ni.

Mizoramah hian pawisa hlawm lian kawl thei SBI branch 11 an awm a, heng zinga chest branch pakua - Bawngkawn, Lunglei, Champhai, Kolasib, Lawngtlai, Mamit, Siaha leh Serchhip-te chu SBI Regional Office hian an enkawl a ni.

Chest branch dang pahnih, Aizawl Main Branch leh Dawrpui Branch chu Regional Business Office hnuaia awm loin, Silchar-a SBI Regional Office-in a enkawl thung a; an pawisa hmuh ang ang pawh direct-in Silchar-ah hian an chhung lut ṭhin.

Pawisa note tihthih a nih avang hian November 28, 2016 thleng khan Rs. 500 leh Rs. 1,000 note hlui bank-a dah luh theihna hun hawn phawt a ni a, chumi hnuah December 30, 206 thleng pawhsei leh a ni.

Pawisa note hlui dah lut hman lote tan chuan March 31, 2017 thleng RBI Office-ahte thleng theih a la ni dawn.

Zawhna chhangin SBI hotute chuan, Rs. 1,000 note thar siam chhuak anga social media-a thu thehdarh chu an hriatpui lo tih sawiin, "Dan pangngaiah chuan pawisa note thar siam chhuah a nih dawn reng rengin RBI aṭangin hriattirna dawn hmasak ṭhin a ni," an ti.