Sawhthing hralh chhuak ṭan

Mizoram thlai thar hralh chhuah kawnga hmala tura Mizoram Cooperative Apex Bank-in a din, Mizoram Agri­culture Marketing So­lution (MAMSoL) chuan Bairabi a MAMSoL Mini Trade Center aṭangin Inrinni aṭang khan sawh­thing an hralh chhuak ṭan a, sawhthingte hi Kolasib DC H Lalengmawia'n a vai liam.

H Lalengmawia chuan MAMSol in kuthna­thawktu­te hma ngaia hma an la chu lawmawm an tih thu sawiin, "Sawhthing thartu­ten hralhna mumal tak an neih theihna tur a ni. A hralh chhuahna tur ngaihtuahtu pawl an awm hi kuthnathawktuten kan hman ṭangkaia kan thlawp ṭhat angai a ni," a ti a, sawhthing chingtute pawh lei tur hnianghnar taka a awm reng theih nan a tharchhuah lama ṭan la zual turin a chah.

MAMSoL chairman T Lalmuanpuii sawi danin, MAMSol hi Mizorama kuthnathawktuten an thlai thar hrang hrangte man bithliah tha tak neia an hralh theihna atana din, sum lama hlawkna aia kuthnathawktute ṭanpui theia awm chu a din chhan ber a ni.

Mizoram loneitute sawh­thing thar lei khawl sak a, Mizoram pawn atanga a lei duh turte Mizorama ko luta leitir chu an tum a, tun dinhmunah India ram puma sawhthing rate a ṭhat tawk loh avanga man sang takin sawhthing a lei thei loh a, a man a san zel an beisei.

Inrinni hian sawh-thing hi qtls. 180 state pawnah an hralh chhuak a, collection centre-ah kg. khat Rs. 9 a lei a ni a, Biarabiah chuan Rs. 10-a lei a ni thung.