KHAWTHLIR

Thisen pe
Inrinni khan Bethlehem Branch KṬP chuan, an din champha leh KTP Day pualin Aizawl Civil Hospital tan thisen unit 54 an pe a, a petute mipa 41 leh hmeichhia 13 an ni a; Thanglailung Students Union, Aizawl ten pe bawkin, mipa pakua leh hmeichhia pangain unit 14 an pe. Tuikual South Branch KṬP-in an rising day pualin Synod Hospital tan thisen unit 19 an pe a, a petute mipa 18 leh hmeichhia pakhat an ni.

Chhunzawm zel
CSS Hindi Teacher-te chuan thla 10 chhung hlawh an lak tawh loh lak leh, February thla tawpa an contract tawp hnua dah ngheh phutna atan CM bangla bulah sit-in demonstration an neih chhunzawm zel a, an thil phut tihhlawhtlin a nih hma chuan chhunzawm zel an tum.

Heroin man
Mizoram police-te chuan February 24, 2017 zanlai vel khan ITI Veng Mualpui road-ah heroin hawng 9, Rs. 4,50,000 vel hû an man a; a neitua puh Lalngaihawma (33) s/o D Thanga, Sesih, Champhai district, tuna Chhinga Venga khawsa cheng mek nia insawi leh Vanlallawmi (36) w/o Bruto Meska, New Eden, Mamit district, ITI Venga khawsa mek nia insawite an man bawk.

Science Centre
Mizoram Science Centre chu National Science Day lawm nan February 28, Thawhlehni hian a duh apiang tan a thlawna tlawh theiha hawn a ni dawn. Mizoram Science Centre hi tlawh turin thuneitute chuan mi zawng zawng an sáwm a ni.

DIET office rawk
Serchhip Chanmari Vengthara DIET Office chu February 24, 2017 zan khan rawk a ni a, principal room-a iron safe-a sum awm zawng zawng, cheng nuai hnih tling lo deuh an la. He thil thlengah hian Serchhip DIET hotute'n Serchhip Police Station-ah FIR an thehlut a, police-te'n bawhzuiin, rinhlelh man an la nei loa thu dawn a ni.