MBOCWWB-in member-te hamthatna A pek thin tihhniam deuh vek a ni

Mizoram Building & Other Construction Workers Welfare Board (MBOCWWB) Rules 2016 chu Assembly-a pass a nih hnuah May 18, 2016 khan sorkarin gazette-ah a tichhuak a; Rules tharah hian MBOCWWB-in an member-te hnena hamṭhatna a pekte chu tihhniam deuh vek a nih bakah, Rules siam dawnah Board member ṭhenkhatin an hre ve lo.

Vanglaini thu dawn danin, labour cess aṭanga MBOCWWB-in sum tam tak a dawn laiin, Rules tharah chuan MBOCWWB-a inziak lutte hamṭhatna dawn chu tihtlem zel a ni a; Board member zinga mi trade union pahnih, FOMTU leh CITUM hotute chuan sorkarah Rules siamṭha turin an thlen a, LEIT department pawhin Rules siam ṭha tur hian an buaipui mek.

MBOCWWB Rules 2016 siam chungchangah hian sorkar gazette-a chhuah hmain Assembly session-ah ngaihtuah a nih hnuah pawm a ni a, chumi hnuah Committee on Subordinate Legislation-in an enho tawh a, rawtna ṭhenkhat siamṭhat a nih hnuah Rules chu gazette-ah tihchhuah a ni.

MBOCWWB-ah hian LEIT Minister, LEIT Secretary leh Director te, Finance leh Planning department aiawh pakhat ve ve, PWD, PHE, Power & Electricity department aṭangin officer pakhat ṭheuh member an ni a; trade union pathum - NTUM, CITUM leh FOMTU president ṭheuh leh women reservation aiawh member pakhat an tel bawk.

Rules siam dawna râwn an nih loh dan sawiin FOMTU president PB Lalsawmliana chuan, "A hmaa Board-in a hman laite ngaihtuah miah loin Rules thar a chhuak a, kan tel ve loh avangin FOMTU chuan Rules hi siam ṭhat a nih theih nan amendment siam turin rawtna kan thlen a, siam ṭhat tum mek niin kan hria," a ti.

Centre of Indian Trade Union of Mizoram (CITUM) president H Lalnunfima chuan, "Rules duan lai kan hria a, department dangah chuan rules siam a nih chuan a hnuaia pawlte'n an enho hmasa leh a, chu mi hnuah Assembly a paltlang ṭhin. Keini chu kan hriatpui lohin Assembly a paltlang thut a ni," a ti a; Rules 2016 chu a ṭhat tawk loh avangin siamṭhat a nih theih rawtna an siam a, LEIT Minister a bân tawh avangin Chief Minister-ah file a awm mek niin a sawi.

MBOCWWB-a SPIO-in RTI Act hmanga MBOCWWB member tlem chhan leh member dinhmun zawhna a chhan danin, LEIT department directorate, Aizawl, Lunglei, Siaha leh Champhaia District Employment Office aṭanga report an dawn tawh loh avangin MBOCWWB office-in an kawl chin a tarlang.

MBOCWWB-ah hian member zat a tlahniam zel a; registration hi kum tin member nihna tihnun (renew) a ngai. A hnuaia valid registration/beneficiary tiha mi 1,486 hi December 31, 2016 thlenga thla 12 dam tura inziak lutte an ni.

MBOCWWB-ah hian a din tirh kum 2011-12 aṭanga kum kal lai 2016-17 thlengin contractor-te'n an hnathawhna sum aṭanga 1% an chhun luh ṭhinah ṭum 2,481 an chhung lut tawh a, an sum chhun luh tawh zawng zawng chu Rs. 46,41,30,443 a ni. Sum hman tawh zawng zawng chu Rs. 23,83,28,443 a ni a, Rs. 22,58,01,960 an la nei tihna a ni.

Vanglaini-in RTI Act hmanga a zawhna an chhan danin, MBOCWWB scheme tharah member-te hamṭhatna tam tak chu tihhniam a ni a, contractor-te sum chhun luh erawh a tam tulh tulh thung tih a lang.

Scheme hluiah Accidental Death Benefit hnuaiah Rs. 2,00,000 pek ṭhin a nih laiin, scheme tharah chuan Rs. 50,000 chiah pek theih a ni tawh. Innei ṭanpuina, Marriage Assistance-ah scheme hluiah Rs. 3,000 thleng pek theih ṭhin chu scheme tharah Rs. 2,000-ah tihniam a ni a; Medical Assistance scheme hluia ni khatah Rs. 500 (ni nga chhung) pek theih ṭhin chu Rs. 300-ah tihhniam a ni.

MBOCWWB member-te fa, HSSLC exam-a an awmna district-a mark hmu sang ber hneha Rs. 10,000 pek ṭhin chu scheme tharah chuan district chhunga Board exam-a a ti ṭha mipa pathum leh hmeichhia pathum hnenah Rs. 1,000, Rs. 700 leh Rs. 500 pek tura siam a ni.

Hna thawhna hmanraw leina tur loan Tool Advance chu scheme hluiah Rs. 50,000 lak theih a ni a, scheme tharah chuan Rs. 5,000 lak theih a ni. Natural Calamities Assistance hnuaiah scheme hluiah Rs. 1,00,000 pek theih a ni ṭhin a, scheme tharah hmuh tur a awm tawh lo. Hetih lai hian, scheme hluia awm ngai lo, Funeral Assistance telh thar a ni a, Rs. 1,000 pek theih a ni.