Minister-in Lawngtlaiah PMAY a hawng

UDPA minister Zodin­tluanga chuan February 24, 2017 khan Lawngtlai L III-a Central Hall-ah PMAY - Housing for All (Urban) a hawng a; thu sawiin, "PMAY-ah hian kan strict dawn a, officer-te namnul theih a ni dawn lo. Sorkar scheme tam tak a lo hlawh­chham tawh a, he scheme hi a hlawhchham kan phal dawn lo," a ti.

Zodintluanga chuan, PMAY hnuaiah Lawngtlai khawpui tan bik a thawh khatnaah chhungkaw 500 tan in sak ṭanpuina pek an nih thu sawiin, "Instalment thumin ṭanpuina pek a ni dawn a, instalment khatna hmang dik lote chu pawisa kan ṭhìn let dawn bakah, instalment dang an dawng dawn lo," a ti a; a hmunah officer-te'n an enfiah zel dawn bakah, mi in sak sa kawh mai theih a ni dawn lo tih a sawi.

Mizo zia ṭha lo tak pakhat chu sum dawnte a nihna tura hman loh tam ṭhin chu a nih thu sawiin, chu chu thlak tumin nasa taka hmalak a nih thu sawiin, Zodintluanga chuan, "A dawng lo tur dawng an awm chuan keini chuan a hmunah kan rawn cancel zel dawn. A mamawhtu dik tak, mi harsa kum khata Rs. 3,00,000 aia tam la lut lo dawn tur a ni," a ti a; a dawng tur thlan zingah concrete in nei an awm a nih chuan inhnûkdâwk turin a ngen nghal.

UDPA Minister chuan, Mizoram chhim, hmar, chhak leh thlang hmun tinah sorkarin hmasawnna vûng a chhuah nia sawiin, "Khawpui leh thing­tlangah NLUP kan kalpui a, mi harsa zawkte leirem rahna tur a ni a, tunah NEDP hmangin ṭanpuina kan kalpui leh mek a ni," a ti.

PMAY hnuaiah hian tuna an awmna khawpuiah kum nga tal awm tawhte ṭanpui tur a ni a, sorkarin Rs. 1,50,000 a pe ang a, a dawngtuin Rs. 50,000 tal a tum ve ang a, in sak chu Rs. 2,00,000 hu a ni tur a ni. LSC an nei ngei tur a ni a, scheme dang la tawh tan a dawn theih loh. A thawh khatnaah Rs. 60,000, thawh hnihnaah Rs. 60,000 leh thawh thumnaah Rs. 30,000 pek tur a ni.