All England a danglam lo - Sindhu

Rio Olympic silver medallist PV Sindhu chuan March 7-12 chhunga khelh tur All England Championship chu a tan Super Series tournament nen a danglamna a awm chuân loh thu a sawi.

Kum 21-a upa Sindhu chuan, "Mite chuan hmun dang aiin All England boruak hi a danglamin a ropui bikin an hre ṭhin. Mahse, ka tan chuan super series tournament dang nen a danglamna a awm chuang lo," tiin badminton inelna upa ber chungchang a sawi.

Indian shuttler zingah Sindhu-i mentor leh chief coach nilai Pullela Gopichand leh legend Prakash Padukone te chiah hi All England champion thei an la ni a, kum 2015 khan Saina Nehwal chuan champion theihna hun nei mah se Olympic champion Carolina Marin a hneh lo thung.

Hyderabad nula Sin­dhu chuan, "Chhun leh zanah ngawrh takin in­buatsaihna ka nei mek a, hlawhtling tur chuan thawhrim a pawimawh tih ka chiang tawh, chu­vangin a ṭha thei ang bera inbuatsaih ka duh," tiin a sawi.

Kumin All England-ah hian Sindhu hi seeded parukna a ni dawn a, a match hmasa berah Den­mark nula Mette Poulsen a hmachhawn ang a, a chak chho zel a nih chuan world number 1 Tai Tzu Ying nen quarterfinal-ah an intawng thei dawn a ni.