Bru-te thil phût NGO-te'n ngaimawh Ngaihchân a, a tul anga hmalak rel

NGO Coordination Committee chu nimin khan Central YMA committee room-a ṭhukhawm chuan, Tripura aṭanga Bru lak let (repatriation) chungchang an ngaihtuah a; Bru-te'n an duh ang ang an phût chu ṭha an ti lo a, a ṭul anga hmalak nise, an ti.

Meeting kaihruaitu CYMA president Lalbiakzuala chuan, Tripura refugee camp-a Bru lak let tura inbuatsaihna a kal laiin, Mizo mipuite'n ngawi renga an ngaihchan thu a sawi a, Bru-te'n thil phût an neih belh reng si avangin ngawih reng chu a ṭha ber lo em tih ngaihtuahna an neih thu sawiin, "Bru-te'n duh ang ang an phût hi ṭha kan ti lo," a ti.

Meeting koh a nih chhan sawi­fiahtu, CYMA general secre­tary Lalhmachhuana sawi danin, Bru chungchangah hian Joint Monitoring Group din a ni a, Ministry of Home Affairs-a Joint Secretary chu chairman a ni. Member-te chu, Mizoram leh Tripura-a Home department Secretary te, Mizorama Bru aiawh pakhat, Tripura refugee camp-a Bru aiawh pahnih leh CYMA President-te an ni.

CYMA President a remchan loh ṭhin avangin meeting-ah CYMA vice president Vanlalruata a tel ṭhin a, Mizoram sorkar aiawhte nen theihtawp chhuah ṭhin mah se, Bru-te'n meeting apiangin thil phût an neih belh zel avangin Bru lak letna tur tihhlawhtlin theih a la ni lo.

Hetiang a nih lai hian Supreme Court-in Bru repatria­tion atana ruahmanna awmte tihhlawhtlin hrih loh tura a tih tâk avangin, sorkar laipui leh state sorkarin engtin nge an kalpui zel ang tih te, NGO Coordination Committee leh Election Commission of India inremna anga refugee camp-a vote an thlak loh ngeina tur tihchian lehzualte leh, electoral roll-a an awm zel a rem em tihte ngaihtuah a ṭul thu a sawi.

Meeting-ah hian Joint Moni­toring Group meeting-a tel ṭhin CYMA vice president Vanlal­ruata chuan, Joint Monito­ring Group kalphung chu a mak thu sawiin, "Tripura Bru aiawh hian Delhi-a cheng medical doctor Dr Dhnanjoy Reang a lo kal ziah a, tlawhna chuan man pawh official-in an pawmpui zel tho," a ti a; chairman pawh MHA Joint Secretary Satyandra Garg tih a nih laiin, Special Secretary-in meeting a kaihhruai ṭhin thu a sawi.

Vanlalruata chuan, political level-ah chuan Bru-te an dah sang ta lo hle tih a hmuh theih tih a sawi a, "Political level-ah hian Mizo mipuite hi eng angin nge kan din tak erawh hriatthiam a har hle," a ti.

Meeting chuan, "Tuikuk mahni insawi ṭhaih a Mizoram chhuahsana Tripura-a awmte, Mizorama an lo kir lehna tura sorkar hmalakna Supreme Court-in a ti tawp rih hi NGO Co-Ordina­tion Committee chuan ngaihchan a, a ṭul anga hmalak ni se," an ti.

Duhsak taka Mizorama an lo kir leh theih nan leh an in chhawm­dawlna atana sorkarin ruahmanna ṭha tak a neih mek lai a, sorkar hmalaknate duhkhawp lo ang maia Joint Monitoring Group meeting neih a pianga thil phut thar an neih belh ziah thin hi NGO Co-Ordination Committee chuan hriatthiam har an tih thu an sawi.

NGO-te chuan Mizoram khua leh tui dik takte 1995 Electoral Roll-a chuang leh an thlah kal zelte chu Mizorama lo let turin a sawmin a ngen nawn leh a ni.

NGO Coordination Commi­ttee-ah hian CYMA, MHIP, MUP, MZP leh MSU-te an tel a ni.